रत्नागिरी:- मुसळधार कोसळणाऱ्या पावसाने खेड तालुक्यातील दाभीळ येथे घरावर दरड कोसळली. कोसळलेल्या दरडीखाली घर आणि कार अशी विचित्र घटना घडली आहे. यात दरडीखाली सापडलेल्या कारचा चक्काचूर झाला. कारसह या दुर्घटनेत दुचाकीही अडकल्या असून या दुर्घटनेतून युवती थोडक्यात बचावली.
दाभीळ येथील संतोष राठोड यांच्या मालकीच्या घरानजिक दुपारच्या सुमारास अचानक दरड कोसळून घर या दरडी गाडले गेले. त्यामध्ये घरासमोर उभी असलेली एक कार व दुचाकी दरडीखाली अडकून लाखोंचे नुकसान झाले. या घरामध्ये असलेली २० वर्षीय युवती स्नेहा राठोड हिने दरड कोसळत असल्याचे लक्षात येताच घराबाहेर धाव घेतल्याने तिचा जीव वाचला.
दरम्यान, या घटनेमध्ये सुदैवाने जीवितहानी टळली आहे. मात्र घर दरडी मध्ये पूर्णतः उदध्वस्त झाल्याने लाखो रुपयांची हानी झाली आहे. राठोड कुटुंबीय बेघर झाले आहे. या घटनेची माहिती स्थानिक ग्रामस्थांना मिळताच त्यांनी घटना स्थळी दाखल होत मदत कार्य केले. सांयकाळी उशिरापर्यत हे मदत कार्य सुरु होते.
