रत्नागिरी:- गेले आठवडाभर जिल्हा शासकीय रुग्णालयातील स्त्रीरोग तज्ज्ञ रजेवर गेल्याने प्रस्तुती विभागात एकही डॉक्टर नाही, खासगी डॉक्टर येतात मात्र ते 24 तास बांधिल नाही, जर एखाद्या गरोदर मातेची तब्येत अधिक बिघडली की, कोल्हापूर सीपीआरला हलवण्याची वेळ रुग्णालयावर आली आहे. खासगी डॉक्टरांनी सहकार्य करावे,असे आवाहन करूनही सिव्हीलला फारसा प्रतिसाद मिळत नाही.
जिल्हा शासकीय रुग्णालयाच्या प्रस्तुती विभागात प्रस्तुतिसाठी दाखल होणार्‍यांची संख्या सर्वाधिक आहे, महिन्याला तब्बल 250 हून अधिक प्रस्तुत्या होत असतात. अगदी रत्नागिरी शहर ते मंडणगड तालुक्याच्या टोकापर्यंत सर्व गरोदर माता या ठिकाणी चांगली सेवा मिळते. म्हणून दाखल होत असतात. मुळात गेली अनेक वर्षे सिव्हिल हॉस्पिटलमध्ये कर्मचारी व वैद्यकीय अधिकारी कमतरता आहे, अशा परिस्थितीत सुद्दा सिव्हिल हॉस्पिटल रुग्णांना चांगली सेवा देण्याचा प्रामाणिकपणे प्रयत्न करत असते.
डेरवण वालावलकर हॉस्पिटलने सध्या मदतीचा हात दिला असून काही पीजीचे डॉक्टर या ठिकाणी येऊन सेवा देतात मात्र स्त्री रोगतज्ज्ञ नसल्याने सध्या प्रस्तुती विभागात कामाचा भार वाढला आहे. दिवसा काही खासगी डॉक्टर येऊन प्रस्तुत्या करून जातात मात्र अद्यापही बरेच खासगी डॉक्टर सिव्हीलला अपेक्षित सहकार्य करत नसल्याची बाब समोर आली आहे.
रुग्णांच्या नातेवाईकांकडूनही आता प्रशासन व खासगी डॉक्टरांना आवाहन करण्यात आले आहे. ग्रामीण भागातील गरोदर मातांची मोठी गैरसोय होत असून ही समस्या मार्गी लावण्यासाठी सहकार्य करावे, गरोदर मातेला कोल्हापूरला नेईपर्यत अनेक समस्यांना सामोरे जावे लागत आहे. खासगी डॉक्टरांनी सहकार्य करावे यासाठी जिल्हा शल्य चिकित्सक डॉ. संघमित्रा फुले बैठक घेणार असल्याचे माहिती त्यांनी दिली. दरम्यान, या आवाहनाला कसा प्रसिसाद मिळतो, हे पाहवे लागणार आहे.
