रत्नागिरी:- शहरातील सावरकर नाट्यगृह समोरील रस्त्यावर दुचाकीच्या ठोकरीत तरुण जखमी झाला. अपघाताबाबत खबर न देता पलायन करणाऱ्या स्वाराविरुद्ध शहर पोलिस ठाण्यात गुन्हा दाखल करण्यात आला आहे. साईराज रमेश भाटकर (रा. एमआयडीसी, रत्नागिरी) असे संशयिताचे नाव आहे. ही घटना रविवारी (ता. २९) दुपारी सव्वाच्या सुमारास सावरकर नाट्यगृह ते लोटलीकर हॉस्पीटल रस्त्यावर घडली.
पोलिसांकडून मिळालेल्या माहितीनुसार फारुख फक्रुद्दीन मुल्ला (वय २४, रा. राजनगर, मजगावरोड, रत्नागिरी) यांचा भाऊ अफान अब्दुल्ला फक्रुद्दीन मुल्ला (वय २२, रा. मजगाव रोड, रत्नागिरी) हा दुचाकीवरुन जात असताना त्यांच्या दुचाकीला संशयिताच्या दुचाकीने धडक दिली. यामध्ये अफान खाली पडून त्यांचा पायाला गंभीर दुखापत झाली. अपघातात अफान ला तेथेच टाकून संशयिताने पलायन केले. या प्रकरणी फारुख मुल्ला यांनी शहर पोलिस ठाण्यात तक्रार दिली. तक्रारीवरुन पोलिसांनी संशयित स्वाराविरुद्ध गुन्हा दाखल केला आहे.
