लांजा:- लांजा येथील वेरळ घाटात शुक्रवारी दुपारी 12.30 च्या सुमारास कंटेनरला अपघात झाला. ही घटना झालेली असतानाच काही तासाच्या फरकाने आणखी एक कंटेनरला अपघात झाला आहे. यामुळे वेरळ घाटातील अपघातांची मालिका सुरूच आहे. अपघातानंतर महामार्गावरील वाहतूक पुन्हा ठप्प होती.
वेरळ येथील अवघड वळणावर बरेच खड्डे पडलेले आहेत. त्यामुळे वाहन चालकांना गाडी चालवताना खड्डे वाचवावे लागतात. परिणामी खड्डा वाचवण्याचा नादात अपघाताला आमंत्रण दिले जात आहे. दुपारी 12.30 च्या दरम्याने एका कंटेनरला अपघात झाला होता. या ठिकाणची वाहतूक पोलिसांनी 4 वाजण्याच्या दरम्यान पूर्ववत केली. मात्र 2 तासाच्या फरकाने सायंकाळी 6.30 वाजण्याच्या सुमारास पुन्हा एका कंटेनरला अपघात झाला आहे. अंदाज न आल्याने गाडीवरील ताबा सुटला आणि कंटेनरला मोठा अपघात झाला. या अपघातात चालक बचावला आहे. अपघाताची माहिती मिळताच पोलीस पुन्हा घटनास्थळी दाखल झाले. पुन्हा वाहतुकीचा खोळंबा झाला. काळोखामुळे पोलिसाना वाहतूक सुरळीत करण्यात अडचणी आल्या, त्यानंतर क्रेनची व्यवस्था करुन 3-4 तासात कंटेनर बाजूला करण्यात आला मात्र त्यामुळे वाहनांच्या रांगा महामार्गावर लागल्या होत्या.
