मंत्री उदय सामंत यांचा गंभीर आरोप
रत्नागिरी:- नीट परीक्षा आणि शैक्षणिक मुद्द्यांवरून सध्या देशातील राजकीय वातावरण चांगलंच तापलं आहे. या पार्श्वभूमीवर राज्याचे उद्योगमंत्री उदय सामंत यांनी पत्रकार परिषद घेत विरोधकांवर जोरदार निशाणा साधला. सुरुवातीला केवळ विद्यार्थ्यांचे आणि सीजेपीचे असलेले हे आंदोलन आता राजकीय स्वार्थासाठी हायजॅक करण्यात आले असून, विरोधक विद्यार्थ्यांच्या खांद्यावर बंदूक ठेवून केंद्र सरकारवर नेम धरत असल्याचा थेट आरोप त्यांनी केला आहे.
मंत्री सामंत म्हणाले की, या आंदोलनामध्ये आता राहुल गांधी, अखिलेश यादव, शरद पवार आणि उद्धव ठाकरे यांच्यासारखे प्रमुख विरोधी नेते सामील झाले आहेत. नरेंद्र मोदी यांच्या विरोधात असलेले सर्व पक्ष एकत्र येऊन या आंदोलनाचा वापर स्वतःच्या बुडत्या पक्षाला उभारी देण्यासाठी करत आहेत. मूळ प्रश्न बाजूला राहून याचे पूर्णपणे राजकीयकरण झाले असून, हा प्रकार विद्यार्थ्यांच्या भविष्याशी खेळणारा आहे.
दिल्लीत झालेल्या लाठीचार्ज प्रकरणावर बोलताना त्यांनी स्पष्ट केले की, शिवसेना कोणत्याही परिस्थितीत विद्यार्थ्यांवरील लाठीचार्जचे समर्थन करत नाही. मात्र, सोशल मीडियावर व्हायरल झालेल्या व्हिडिओंमधून अनेक गोष्टी समोर आल्या आहेत. पोलिसांनी आधी बळाचा वापर केला की आंदोलकांनी पोलिसांवर हात उचलला, हे तपासणे गरजेचे आहे. जेव्हा पोलिसांवर हल्ला होतो, तेव्हा त्याचे पडसाद उमटतात. विशेष म्हणजे, ज्यावेळी हा लाठीचार्ज झाला, तेव्हा तिथे विद्यार्थ्यांचे नेतृत्व करणारे मोठे नेते उपस्थित नव्हते. सीजेपीचा एक प्रवक्ता तिथे बर्गर खात होता आणि त्याला मारहाण झाली. या आंदोलनात नववीतील मुले आणि स्वतःला ‘बीए’ झालेले सांगणारे तरुण आणले गेले होते, ज्यांना ‘बीए’चा लॉंगफॉर्मही सांगता येत नव्हता, असा टोलाही त्यांनी लगावला.
सामंत यांनी पुनरुच्चार केला की, शिवसेना विद्यार्थ्यांच्या पाठीशी खंबीरपणे उभी आहे. नीट परीक्षेतील गैरव्यवहाराची सखोल चौकशी झाली पाहिजे, पेपर फोडणाऱ्यांना कठोर शिक्षा झाली पाहिजे आणि विद्यार्थ्यांचे झालेले नुकसान भरून मिळाले पाहिजे, हीच शिवसेनेची स्पष्ट भूमिका आहे. ज्येष्ठ नेते शरद पवार यांनी पंतप्रधान नरेंद्र मोदी यांची घेतलेली भेट हा राजकीय सुसंस्कृतपणाचा भाग असला, तरी इतर विरोधी पक्ष मात्र या आंदोलनावर स्वार होऊन स्वतःच्या पोळ्या भाजून घेत आहेत, अशी टीका त्यांनी केली.
या पत्रकार परिषदेत त्यांनी राज्य सरकारच्या नवीन उपक्रमाचीही माहिती दिली. राज्याचे उपमुख्यमंत्री अजित पवार यांच्या वाढदिवसाचे औचित्य साधून राज्यात आजपासून ‘छत्रपती शिवाजी महाराज महा राजस्व अभियान’ सुरू करण्यात आले आहे. मुख्यमंत्री एकनाथ शिंदे यांनी सुरू केलेल्या ‘शासन आपल्या दारी’ या संकल्पनेचाच हा पुढचा भाग आहे. या अभियानांतर्गत गाव, तालुका आणि जिल्हा पातळीवर नागरिकांना विविध दाखले आणि शासकीय सेवा सुलभतेने मिळतील. २२ जुलै ते २ ऑगस्ट दरम्यान हे अभियान चालणार असून महसूल मंत्री चंद्रशेखर बावनकुळे यांच्या उपस्थितीत याचा समारोप होईल.
