पावस:- रत्नागिरी तालुक्यातील गोळप येथील प्रगतशील शेतकरी प्रकाश साळवी आणि रफिक मुकादम यांच्या प्रक्षेत्रावर ड्रोनद्वारे पीक संरक्षण फवारणी प्रात्यक्षिक घेण्यात आले. या वेळी ड्रोनविषयी परिपूर्ण माहिती, ड्रोनमुळे मजूर व कीटकनाशके, बुरशीनाशकांची होणारी बचत आदीची माहिती देण्यात आली.
कृषी तंत्रज्ञान व्यवस्थापन यंत्रणा (आत्मा) व माऊली ग्रीन आर्मी महाराष्ट्र राज्य पर्यावरण समिती, तसेच रत्नागिरी कृषी विभाग यांच्या विद्यमाने हे प्रात्यक्षिक दाखविण्यात आले. या वेळी जिल्हा कृषी अधीक्षक सुनंदा कुऱ्हाडे, नाईकनवरे, भोये, माधव बापट, मेहेर, महाराष्ट्र राज्य पर्यावरण समितीचे बाळासाहेब सानप व टीम तसेच कृषी विभाग रत्नागिरी सर्व अधिकारी व कर्मचारी व पावस पंचक्रोशीतील शेतकरी उपस्थित होते.
या वेळी सानप यांनी ड्रोनद्वारे फवारणी पिकाच्या सर्व भागावर औषध पोचवते. उंच सखल भागावर समान उंचीवरून फवारणी होते. तसेच कीटकनाशक औषध संपणाऱ्या ठिकाणाची नोंद करता येते. हवेच्या दाबामुळे पानाच्या दोन्ही बाजूला समान फवारणी होते. अशा तऱ्हेने भविष्यात ड्रोनद्वारे पीक संरक्षण औषध फवारणी, आंबा बागायतदारांना चांगल्याप्रकारे कशा तऱ्हेने फायदेशीर होईल याची माहिती प्रात्यक्षिकाद्वारे करून दाखवली. या परिसरातील हा पहिलाच प्रयोग असल्याने बागायतदार यांनी समाधान व्यक्त केले.
