ऑनलाईन शिक्षणाबरोबर ऑफलाईन लेक्चरची सुविधा
रत्नागिरी : कोरोना संक्रमणाच्या शक्यतेने सध्या सरकार व शिक्षण संस्थांची पसंती ऑनलाईन शिक्षणाला दिसून येत आहे. विद्यार्थ्यांचं शिक्षण थांबू नये, कोरोनाचा प्रादुर्भाव वाढू नये, शाळा सुरू झाल्यानंतर विद्यार्थ्यांवर अभ्यासाचा ताण वाढू नये हा यामागील उद्देश आहे. पण, ग्रामीण भागात सध्या इंटरनेट सुविधा, पालकांकडे अद्ययावत मोबाईल नसणे यासारख्या समस्यांचा देखील सामना करावा लागत आहे. त्यामुळे अनेक भागात ऑनलाईन शिक्षणाचा बोजवारा उडालेला पहायाला मिळत आहे. रत्नागिरीतील दोन इंजिनिअरिंग विद्यार्थ्यांनी तयार केलेलं क्लेव्हर ग्राऊंड अॅपमुळे या समस्या सुटताना दिसून येत आहेत.
हा अॅप स्थापित केलेल्या जिल्ह्यातील दोन तरुणांपैकी एक हा सिद्धार्थ मूळचा चिपळूणचा असून तो नंतर पुण्यात स्थायिक झाला. मेकॅनिकल इंजिनीअरिंगमध्ये करिअर करण्यासाठी तो अमेरिकेत गेला. पण पंतप्रधान नरेंद्र मोदी यांनी केलेल्या आवाहनाला प्रतिसाद देत त्याने अमेरिकेतून भारतात येण्याचा निर्णय घेतला. त्याची सौरभ (तुळसणी, ता. संगमेश्वर) या ऑटोमोबाइल इंजिनीअरिंग केलेल्या तरुणाशी भेट झाली आणि त्या दोघांनी वेगळे काहीतरी करायचे ठरवले. त्यातूनच क्लेव्हरग्राउंड (CleverGground) या अॅपची निर्मिती झाली. अमेरिकेत असताना सिद्धार्थने तेथील ऑनलाइन शिक्षण पद्धती पाहिली होती. त्या तुलनेत भारतातील ऑनलाइन शिक्षण अगदीच प्राथमिक अवस्थेत असल्याचे त्याच्या लक्षात आले. भारतात पेपवर्कवर भर दिला जातो. अमेरिकेत पेपरवरर्क होतच नाही. हा फरक जाणवल्यानंतर तसेच ग्रामीण भागातील विद्यार्थ्यांना येणाऱ्या इंटरनेटसह इतर समस्या लक्षात घेऊन नवे अॅप विकसित करण्यात आले. त्यासाठी दोन वर्षांपूर्वी कंपनी सुरू करण्यात आली. त्याच दरम्यान करोनाप्रतिबंधक लॉकडाउन सुरू झाले आणि ऑनलाइन शिक्षणाचे महत्त्व सर्वांच्याच लक्षात आले आणि नव्या अॅपला चांगला प्रतिसाद मिळू लागला. ऑनलाइन शिक्षणासाठी झूमपासून अनेक अॅप्स गूगल प्ले स्टोअरवर उपलब्ध आहेत. पण इंटरनेटअभावी विद्यार्थ्यांंच्या शिक्षणात अडथळे येतात. शिवाय विद्यार्थ्यांना झालेले लेक्चर पुन्हा पाहत शंकानिरसन करणे कठीण होते. अशा वेळी अॅप नक्कीच फायदेशीर ठरते. या अॅपमध्ये इंटरनेट समस्या असल्यास विद्यार्थी लेक्चर डाउनलोड करून ऑफलाइन पाहू शकतो. विद्यार्थ्याने लेक्चर किती वेळा पाहिले, हेदेखील शिक्षकांना कळते. लेक्चर रेकॉर्ड करत विद्यार्थ्यांना पाठवतादेखील येते. मुलांना नोट्स पाठवणे, गृहपाठ पाठवून ते तपासणे. ऑनलाइन एमसीक्यू अर्थात योग्य पर्याय निवडा असे प्रश्नदेखील या माध्यमातून घेता येतात. हे प्रश्न आपोआप तपासले जाऊन त्याचे मार्क्स पालक आणि विद्यार्थ्यांनादेखील कळतात. शिवाय ऑनलाइन अॅडमिशनचा विचार करत प्रवेश प्रक्रिया, हजेरी, प्रगतीपुस्तक इत्यादी गोष्टीदेखील ऑनलाइन पाहता येतात. सध्या राज्यभरातून या अॅपला प्रतिसाद वाढला आहे. सध्या चिपळूण, रत्नागिरी, कोल्हापूर आणि पुण्यासह राज्यभरातील शंभरपेक्षा अधिक शैक्षणिक संस्था तसेच खासगी क्लासेसमध्ये क्लेव्हरग्राउंड अॅपचा वापर केला जात आहे. अॅपचा वापर करणऱ्या सुमारे ९० विद्यार्थ्यांच्या गुणवत्तेत कमालीची वाढ झाली आहे. लोकल फॉर व्होकल, मेक इन इंडिया या उपक्रमांचा फायदा नक्कीच होणार असल्याचे पाथरे आणि सुर्वे यांनी सांगितले. आपल्या माणसांकरिता काहीतरी करता येत असल्याचे समाधान वाटत असल्याचेही ते म्हणाले.
