लांजा:-बिल्डिंग वरून पडल्याने २१ वर्षीय तरुणाचा मृत्यू झाल्याची हातून घडली. लांजा तालुक्यातील पानगलेवाडी कोकण पार्क बिल्डींग येथे सोमवारी २ मे रोजी रात्री १०.३० वाजण्याच्या सुमारास ही घटना घडली. मोबाईलवर बोलत असताना बिल्डिंगवरुन तोल जाऊन खाली पडल्याने २१ वर्षीय परप्रांतीय तरुणाचा जागीच मृत्यू झाल्याची घटना समोर आली आहे.
पोलिसांनी दिलेल्या माहितीनुसार, कोकण पार्क बिल्डिंगचे कामावर परप्रांतीय कामगार काम करत असतात. काम आटोपून रात्री दहा वाजता एकत्र जेवण करतात. नेहमीप्रमाणे सोमवारी २ मे रोजी दहा वाजता अजय राजाराम वर्मा ( २१, राहणार असोथर, जिल्हा फतेहपुर राज्य उत्तर प्रदेश, सध्या राहणार लांजा पानगलेवाडी) हा आपला मोबाईल घेऊन बोलत बोलत कोकण पार्क बिल्डींगवर गेला होता. मोबाईलवर बोलत असताना त्याचा अचानक तोल गेला आणि तो बिल्डिंगवरून खाली पडला. त्याच्या डोक्याला गंभीर दुखापत होऊन त्याचा जागीच मृत्यू झाला. याबाबतची खबर त्याचा चुलत भाऊ अशोक दयाराम वर्मा (वय २४) याने लांजा पोलिसांना दिली. ही घटना रात्री साडेदहा वाजण्याच्या दरम्यान घडली. घटनेची माहिती मिळताच लांजा पोलिस घटनास्थळी दाखल झाले. त्यानंतर घटनेचा पंचनामा करण्यात आला. लांजा पोलिस ठाण्यात आकस्मिक मृत्यूची नोंद करण्यात आली आहे.
