मोफत प्रवेशाची लॉटरी 5 एप्रिलला फुटणार

रत्नागिरी:- बालकांना मोफत आणि सक्तीच्या शिक्षण अधिकार कायद्यानुसार राज्यातील खासगी शाळांमध्ये 25 टक्के जागा मागास, आर्थिक दुर्बल आणि अल्पसंख्याक घटकांसाठी राखीव ठेवल्या जातात. यंदा रत्नागिरी जिल्ह्यातील 1 हजार 50 विद्यार्थ्यांसह राज्यातील 1 लाख 1 हजार 969 विद्यार्थ्यांना ‘आरटीई’ तून मोफत प्रवेश मिळणार आहे. 5 एप्रिल रोजी या प्रवेशाची लॉटरी निघणार आहे. याकडे पालकांचे लक्ष लागून राहिले आहे.

इंग्रजी माध्यमाच्या नामांकित शाळांमध्ये शिक्षण घेण्याचे स्वप्न आर्थिक परिस्थितीमुळे पूर्ण होत नाही. त्या समाज घटकातील मुलांची स्वप्नपूर्ती‘आरटीई’च्या माध्यमातून केली जाते. दरवर्षी राज्यातील नामांकित इंग्रजी माध्यमांच्या शाळांमधील एकूण प्रवेश क्षमतेतील 25 टक्के जागा राखून ठेवल्या जातात. कायद्याने संबंधित शाळांसाठी ते सक्तीचे आहे. 2023 – 24 या शैक्षणिक वर्षात राज्यातील आठ हजार 828 इंग्रजी माध्यमांच्या खासगी शाळांमध्ये ‘आरटीई’ अंतर्गत प्रवेश मिळणार आहे. यावर्षी प्रवेशाच्या एक लाख एक हजार 969 जागा असून, त्यासाठी राज्यभरातून तीन लाख 66 हजार 562 विद्यार्थ्यांचे (तीनपट) अर्ज प्राप्त झाले आहेत. यामध्ये रत्नागिरी जिल्ह्यातून 929 जागांसाठी 1 हजार 50 विद्यार्थ्यांचे अर्ज आहेत. पण, त्यात काही दुबार, अपात्र,
त्रुटी असलेले अर्ज देखील असतात. त्याची पडताळणी सध्या ‘एनआयसी’च्या माध्यमातून सुरु आहे. ते काम पूर्ण होताच ऑनलाइन पद्धतीने लॉटरी काढली जाणार
आहे.

प्रवेश प्रक्रिया पूर्णतः ऑनलाइन असल्याने त्यात कोणताही मानवी हस्तक्षेप चालत नाही. लॉटरी निघाल्यानंतर प्रवेशासाठी ठराविक मुदत दिली जाते. त्यानंतरही काही जागा रिक्त राहिल्यास प्रतीक्षा यादीतील विद्यार्थ्यांना संधी दिली जाणार आहे.
प्रवेश निश्चित करण्यासाठी संबंधित शाळेत जाताना पालकांना त्यांच्याकडे जात प्रमाणपत्र, रहिवासी दाखला, मुलाचे आधार कार्ड, अशी प्रवेश अर्जावेळी भरलेल्या माहितीनुसार सर्व कागदपत्रे न्यावी लागणार आहेत. तसेच खुल्या प्रवर्गातील, एसईबीसी प्रवर्गातील मुलांसाठी एक लाखापेक्षा कमी उत्पन्न असल्याचा पालकांचा उत्पन्न दाखला आवश्यक आहे. दरम्यान, प्रवेश निश्चित झालेल्या म्हणजेच लॉटरीत नंबर लागलेल्या मुलांच्या पालकांच्या मोबाईलवर मेसेज येणार आहेत.