रत्नागिरी:- हिंदू ह्रदययसम्रट शिवसेना प्रमुख बाळासाहेब ठाकरे यांची शिवसेना संपविण्याचा घाट सत्तेतील सहयोगी पक्षांनी घातला आहे. त्यांच्या विळख्यातून शिवसेनेला बाहेर काढण्यासाठी मी मंत्री ना.एकनाथ शिंदे गटात सहभागी झालो आहे. मी शिवसेना सोडलेली नाही.मी शिवसेनेतच आहे. मतदार संघातील पक्षाच्या पदाधिकारी, मतदारांनी गैरसमज करुन घेवू नये असे आवाहन शिवसेना उपनेते तथा रत्नागिरीचे आमदार उदय सामंत यांनी व्हिडीओद्वारे केले आहे. मंगळवारी ट्विटरवरुन त्यांनी हा व्हिडिओ प्रसारीत करत आवाहन केले आहे.
राज्यसभा निवडणुकीत संभाजीराजे छत्रपती यांना उमेदवारी नाकारून पक्षाने एका सच्चा शिवसैनिकाला राज्यसभेवर पाठवण्याचा निर्णय घेतला , मात्र त्या निवडणुकीत देखील हा उमेदवार निवडून येऊ नये म्हणून मित्रपक्षांनी प्रयत्न केले. असा आरोप आ.उदय सामंत यांनी यावेळी केला.
मित्रपक्षामुळे शिवसेनाप्रमुख बाळासाहेब ठाकरे यांना अभिप्रेत असलेले हिंदुत्व पुढे घेऊन जाणार्या एकनाथ शिंदे यांच्यासोबत जाण्याचा निर्णय घेतला आहे. असे असलं तरीही आजही मीे शिवसेनेतच असून त्याबद्दल सर्वसामान्य शिवसैनिकांनी कोकणातील जनतेने कोणताही गैरसमज करून घेऊ नये असे आवाहन त्यांनी केले. आपल्याला बाळासाहेब ठाकरे यांचे विचार पुढे घेवून जायचे आहे. त्यामुळे शिवसैनिकांनी कोणाच्याही गैरसमजाला बळी पडू नये असे आवाहन आ.सामंत यांनी केले आहे.
