१०० लोकांची केलेय नेमणूक; वैद्यकीय साहित्याचे करण्यात आले वाटप
रत्नागिरी:-महामार्गावर अपघात झाल्यानंतर जखमींवर त्वरीत प्राथमिक उपचार व्हावेत यासाठी महामार्गालगत असलेल्या गावातील निवडक व्यक्तींना प्रशिक्षण देऊन त्यांची हायवे मृत्युंजय देवदुत म्हणून नेमणूक करण्यात आली आहे. अशा १०० देवदुतांना महामार्ग पोलिसांकडून प्रशिक्षण देण्यात आले असून नुकतीच त्यांना मेडिकल साहित्याचेही वाटप करण्यात आले.
यावेळी महामार्ग रत्नागिरी विभागाच्या प्रभारी पोलीस निरीक्षक रेश्मा कुंभार, हातखंबा महामार्ग सहाय्यक पोलीस निरीक्षक अमर पाटील, डेरवण वालावलकर रुग्णालयाचे प्रशासकीय अधिकारी प्रफुल्ल गोडबोले, सहाय्यक पोलीस उपनिरीक्षक संतोष सावंत, सचिन घाग यांच्यासह सर्व वाहतूक पोलीस कर्मचारी प्रातिनिधीक स्वरुपात मृत्यूंजय देवदूत उपस्थित होते.
यासाठी महामार्ग पोलीस विभागाचे पोलीस महासंचालक डॉ. भुषणकुमार उपाध्याय यांच्या संकल्पनेतून हा उपक्रम सुरु करण्यात आला आहे. त्यानुसार मार्चमध्ये १०० व्यक्तींना परिपूर्ण ट्रेनिंग डेरवण रुग्णालयात दिले आहे. विठ्ठलराव जोशी ट्रस्ट संचलित डेरवण रुग्णालयाने १० स्ट्रेचर व अल्ट्राटेक सिमेंट कंपनी रत्नागिरी यांनी प्रथमोपचार किट विनामुल्य मृत्युंजय पथकासाठी उपलब्ध करुन दिले आहेत. तसेच ही पथके साखरपा, ओणी, राजापूर, लांजा या ठिकाणी नेमण्यात आली आहे. अशाप्रकारे पहिल्यांदाच उपक्रम सुरु करण्यात आला आहे.
