मंडणगड:- मंडणगड नगरपंचायत नगराध्यक्षपदाची निवड अत्यंत चुरशीची झाली. नगराध्यक्षपदी ॲड. सोनल बेर्डे अवघ्या एका मताने विजयी झाल्या. उपनगराध्यक्षपदी वैभव कोकाटे यांची निवड करण्यात आली आहे. ही निवडणूक प्रकिया अधिकारी भाग्यश्री मोरे व मुख्याधिकारी विनोद डवले यांनी पार पाडली.
मंडणगड नगरपंचायतीचे नगराध्यक्ष व उपनगराध्यक्ष पदाच्या निवडीसाठी मंडणगड नगरपंचायत कार्यालयात निवडणूक निर्णय अधिकारी भाग्यश्री मोरे व मुख्याधिकारी विनोद डवले व सर्व नगरसेवक यांच्या उपस्थितीत कार्यक्रम राबविण्यात आला. यावेळी नगराध्यक्ष पदाच्या निवडणुकीत शहर विकास आघाडीकडून विनोद जाधव तर महाविकास आघाडीकडून ॲड. सोनल बेर्डे यांनी अर्ज दाखल केले होते.
सर्व नगरसेवकांच्या उपस्थितीत हात वर करुन निवडणूक मतदान प्रक्रिया राबवण्यात आली. यावेळी सोनल बेर्डे यांच्या बाजूने ९ नगरसेवकांनी हात वर करुन आपले समर्थन जाहीर केले. तर विनोद जाधव यांना ८ नगरसेवकांचे समर्थन मिळाले. एका मताच्या फरकाने सोनल बेर्डे यांची निवड झाल्याचे निवडणूक निर्णय अधिकारी भाग्यश्री मोरे यांनी जाहीर केले.
उपनगराध्यक्ष पदासाठी महाविकास आघाडीकडून वैभव कोकाटे तर शहर विकास आघाडीकडून आदेश मर्चंडे यांनी आपले उमेदवारी अर्ज दाखल केले होते. नगराध्यक्षांच्या निवडीनंतर उपनगराध्यक्षाची निवड प्रक्रियाही हात वर करुन राबवण्यात आली. यामध्ये वैभव कोकाटे यांना ९ तर आदेश मर्चंडे यांना ८ नगरसेवकांचे समर्थन मिळाले. एकामताच्या फरकाने वैभव कोकाटे यांची उपनगराध्यक्षपदी निवडी झाल्याने निवडणूक निर्णय अधिकारी भाग्यश्री मोरे यांनी जाहीर केले.
आमदार संजय कदम, राष्ट्रवादीचे जिल्हाध्यक्ष बाबाजी जाधव, शिवसेनेचे माजी तालुकाप्रमुख संतोष घोसाळकर, पंचायत समिती सदस्य नितीन म्हामुणकर, राष्ट्रवादीचे तालुका अध्यक्ष मुझफ्फर मुकादम, रमेश दळवी, भाई पोस्टुरे, सायली कदम, दापोलीचे माजी सभापती राजेश गुजर, जिल्हा परिषद सदस्य प्रमोद जाधव, नेहा जाधव, दीपक घोसाळकर, दिनेश सापटे, दीनेश लेंडे, राजाराम लेंढे, राकेश साळुखे आदी यावेळी उपस्थित होते.
