रत्नागिरी:- गणेशाच्या आगमनानंतर आज घरोघरी गौरीचे आगमन झाले. अगदी वाजत-गाजत आणि खास करून कोकणात बैलगाडीतून पारंपारीक पध्दतीने गौरी घरोघरी विराजमान झाली. आज गौरी आल्यातरी काही ठिकाणी गौरीला मांसाहारी नैवेद्य दाखवण्याची प्रथा असून सोमवारी ही प्रथा पाळली जाते.
झिम्मा फुगडीच्या तालावर आणि ठिकठिकाणच्या पाणवट्यावरून वाजत-गाजत गौरीचे डहाळे घेऊन आलेल्या माहेरवाशीनींसह मुलींचे औक्षण करून सुवासिनींनी देव्हार्‍यावर गौरीला विराजमान केले. दुपारनंतर मुखवट्यासह सजलेल्या गौरी उभारण्यासाठी गृहीणींचा उत्साह ओसंडून वाहत होता. दागिन्यांनी मढलेल्या आणि मांगल्याचा साज ल्यालेल्या गौरीला आज शाकाहारी व्हेज नैवेद्य दाखवण्यात आला असला तरी कोकणातील अनेक घरांमध्ये सोमवार असला तरी गौरीला मांसाहारी नैवेद्य दाखवण्याची परंपरा आहे.
गणपती पाठोपाठ कोकणात गौरीचे धुमधडाक्यात स्वागत केले जाते. गौरीच्या आगमनासाठी बाजारपेठादेखील फुलुन जातात. मागील दोन दिवसापासून गौरीच्या स्वागतासाठी लागणारे साहित्य बाजारपेठेत दाखल झाले होते. गौरीचे मुखवटे, गौरीची मूर्ती यावर्षी आकर्षणाचा विषय होता. त्याचसोबत गौरीला लागणारी ठूशी, मंगळसूत्र, नथी, कंबरपट्टी, गौरी मुकूट, बोरमाळ, मोहनमाळ आदी साहित्यांनी बाजारपेठ फुलुन गेली होती.
आज सकाळपासूनच गौरी आणण्यासाठी गडबड उडाली होती. ठिकठिकाणच्या विहीरी, नद्या तसेच पाणवट्यावर सुवासिनी आणि मुलींनी गर्दी केली होती. भरजरी साड्या नेसून आलेल्या सुवासिनींपासून ते मुलींपर्यंतचा उत्साह वाखाणण्याजोगा होता. झिम्म्याचे फेर धरतच गौरीच्या डहाळ्याची पूजा करण्यात आली. यानंतर पारंपारीक वाद्याच्या निनादात गौरी मिरवणुकीने आपआपल्या घरी नेण्यात आल्या.
