रत्नागिरी:– मंगळवारी रेल्वेच्या तिरुनेलवेली – जामनगर एक्स्प्रेसने प्रवास करणाऱ्या प्रौढ प्रवाशाच्या डोक्याला दगड लागून गंभीर जखमी झाला. रेल्वे पोलिसांनी त्याला उपचारासाठी जिल्हा शासकीय रुग्णालयात दाखल केले आहे. रुग्णालयाच्या पोलिस चौकीत या अपघाताची नोंद करण्यात आली आहे.
अब्दुल मज्जीद अबूबक्कर काडबेन (५५, रा. सध्या माहीम- मुंबई मुळ : केरळ) असे जखमी प्रौढाचे नाव आहे. ही घटना मंगळवार दि. ३० मे रोजी सकाळी ९.३० वा. सुमारास निवसर रेल्वे स्टेशन दरम्यान घडली.
अब्बूलमज्जीद काडबेन हे मुंबईमध्ये माहिम येथे काम करतात. मंगळवारी ते तिरुन्नवेल्ली जामनगर एक्स्प्रेसने प्रवास करत असताना रत्नागिरी रेल्वेस्टेशनच्या मागे साधारण निवसर रेल्वे स्टेशनच्या आसपास डोंगरातून दगड खाली आला आणि चक्क खिडकीतून त्यांच्या डोक्याला लागला. त्यामध्ये ते गंभीर जखमी झाले. बोगी मधील इतर प्रवाशांनी त्यांना पाणी वैगरे देऊन डोक्याला पट्टी बांधून रत्नागिरीत रेल्वे स्टेशनपर्यंत आणले.
रेल्वे पोलिसांनी तत्काळ दखल घेत बोगीत येऊन अब्दलमज्जीद काडबेन यांना उपचारासाठी जिल्हा शासकीय रुग्णालयात दाखल केले. रुग्णालयातील डॉक्टरांनी त्यांच्या उपचार केले असून त्यांच्या डोक्याला पाच-सहा टाके पडले आहेत. आता त्यांची तब्बेत स्थिर आहे. प्रवासात उन्हाळ्यामुळे रेल्वेची खिडकी उघडी असल्याने हा प्रकार घडला.
रेल्वे प्रशासनाने रेल्वे मार्गावर डोंगराळ भागात काही ठिकाणी जाळ्या लावल्या आहेत. मात्र काही ठिकाणी अजूनही जाळ्या बसवण्यात आलेल्या नसून रेल्वेच्या जाण्या-येण्याच्या हादऱ्याने दगड खाली येत अशा दुर्घटना होत आहेत.
