अनेक ठिकाणी दहीहंडयांना राजकीय स्वरूप
रत्नागिरी:- अखेर दोन वर्षांची प्रतीक्षा संपुष्टात आली आहे. गोविंदा आला रे आला… गोविंदा रे गोपाळा… या गीतांवर थिरकत जल्लोषात साजरा होणारया दहीहंडीसाठी गोविंदा सज्ज झाले आहेत. जिल्हयात यावर्षी २५१ सार्वजनिक तर २३३९ ग्वाजगी हंडया उभारण्यात येणार आहेत. तर ८ ठिकाणी मिरवणुकीचे आयोजन करण्यात आले आहे. अनेक ठिकाणी दहीहंडयांना राजकीय स्वरूप लाभणार आहे.
दहीहंडी सर्वत्र जल्लोषात साजरी करण्यात येणार आहे. या उत्सवात तरुणांचा जल्लोष असतो. दोन दिवसांवर आलेल्या दहीहंडी उत्सवासाठी रत्नागिरी जिल्हयातील गोविंदा पथक सज्ज झाली असून काही पथकांमार्फत सराव सुरू आहे. मुंबई पुण्यासह रत्नागिरी जिल्हयातही दहीहंडीचा उत्सव मोठया उत्साहात साजरा केला जातो. सात ते आठ थर असणारया हंड्या फोडण्यासाठी जिल्हयातील पथकांसह जिल्ह्याबाहेरची पथकेही येतात. सध्या दहीहंडयांच्या थरांबरोबर ठेवण्यात आलेल्या बक्षिसांच्या किंमतीतही स्पर्धा असल्याने सध्या दहीहंडीला राजकीय स्वरूप प्राप्त झाले आहे.
गतवर्षी महाराष्ट्र सरकारने सन २०१२ मध्ये जाहिर केलेल्या क्रीडा धोरणात गोविंदाच्या साहसी क्रीडा प्रकारात समावेश केला आहे. गोविंदांच्या सुरक्षेची काळजी घेण्याची जबाबदारी गोविंदा पथकांवरच राहणार आहे. गोविंदांच्या सुरक्षेसाठी रुग्णवाहिका, डॉक्टर यासह इतर सर्व उपाययोजनांची व्यवस्था गोविंदा पथकांनाच करावी लागणार आहे.
जिल्हयातील गोविंदा उत्साहात साजरा करण्यासाठी सज्ज झाले असून जिल्ह्यात यावर्षी २५१ सार्वजनिक तर २३३९ खाजगी दहीहंड्या फोडल्या जाणार आहेत. सर्वाधिक हंडया जयगड, दापोली, मंडणगड, बाणकोट, दाभोळ येथे फोडण्यात येणार आहेत.
रत्नागिरी शहर सार्वजनिक ६ खाजगी ७०, रत्नागिरी ग्रामीण सार्वजनिक ५५ खाजगी ६६, जयगड सार्वजनिक १५ खाजगी १३२, राजापूर सार्वजनिक ३५ खाजगी ५०, नाटे सार्वजनिक १ खाजगी ९६, लांजा सार्वजनिक २७ खाजगी ५५, देवरूख सार्वजनिक ८ खाजगी ३०, संगमेश्वर सार्वजनिक ७ खाजगी १००, सावर्डे सार्वजनिक ४ खाजगी १५०, चिपळूण सार्वजनिक १३ खाजगी ३००, अलार सार्वजनिक ५ खाजगी ३०, गुहागर सार्वजनिक ६ खाजगी १००, खेड सार्वजनिक १४ खाजगी ३००, दापोली सार्वजनिक २७ खाजगी ३००, मंडणगड सार्वजनिक ४ खाजगी १८३, बाणकोट सार्वजनिक ११ खाजगी २००, पूर्णगड सार्वजनिक १० खाजगी २०, दाभोळ सार्वजनिक ३ खाजगी १५७ दहीहंडी उत्सव साजरे केले जाणार आहे.
