राजापूर:- राजापूर पोलीस स्थानकात नापत्ता म्हणून नोंद असलेल्या तालुक्यातील दोनिवडे गावातील सुरेश सदाशिव बेंद्रे (६५) यांचा मृतदेह बुधवारी सकाळी अर्जुना नदीपात्रात आढळुन आला आहे. तशी माहिती राजापूर पोलीसांना दिली आहे.
सुरेश सदाशिव बेंद्रे हे सोमवारी ४ ऑगस्ट रोजी सकाळी घरा बाहेर पडले होते. ते परत घरी आले नसल्याने त्यांचा नातेवाईकांनी शोध घेतला अ असता ते आढळून आले नाहीत. दरम्यान त्यांच्या पायातील चप्पल या दोनिवडे गावात नदीपात्रालगत दिसून आल्या होत्या. त्यानंतर त्यांचे बंधू जगन्नाथ बेंद्रे यांनी तात्काळ राजापूर पोलीस स्थानकात सुरेश हे नापत्ता असल्याची तक्रार नोंदविली होती. या प्रकरणी पोलीसांनी शोध सुरू केला होता. त्यांच्या चप्पल नदीकिनाऱ्यालगत आढळून आल्याने ते नदीपात्रात पडल्याची शंका होती. त्या दृष्टीनेही पोलीसांसह स्थानिक ग्रामस्थांकडून गेले दोन दिवस शोध घेतला जात होता.
राजापूर पोलीस प्रशासनाकडून चिपळूण येथून NDRF ची टीम बोलावण्यात आलेली होती. मात्र ही टीम पोहचण्यापुर्वीच राजापूर पोलीस निरीक्षक अमित यादव यांच्या मार्गदर्शनाखाली पोलीस तसेच स्थानिक ग्रामस्थ यांसह राजापूरचे माजी नगराध्यक्ष हनिफ मुसा काझी, बेंद्रे यांचे पुतणे दीपक बेंद्रे हे नदीपात्रात त्यांचा शोध घेत असतानाच बुधवारी सकाळी सुरेश बेंद्रे यांचा मृतदेह अर्जुना नदीपात्रात शिळ परिसरात आढळून आला. यानंतर पंचनामा व शवविच्छेदन करून हा मृतदेह नातेवाईकांच्या ताब्यात देण्यात आला.
या प्रकरणी राजापूर पोलीसांनी आकस्मिक मृत्यु अशी नोंद केली असून अधिक तपास पोलीस करत आहेत.
