रत्नागिरी:- तालुक्यातील तीन ग्रामपंचायतीसाठी उद्या (ता. १६) मतदान होणार आहे. उद्धव बाळासाहेब ठाकरे शिवसेना, राष्ट्रवादी आणि कॉंग्रेस या महाविकास आघाडी विरुद्ध बाळासाहेबांची शिवसेना या शिंदे गटामध्येच जोरदार चुरूस होणार आहे. यात सर्वांत जास्त शिरगाव आणि फणसोप ग्रामपंचायत लक्षवेधी ठरली आहे. ३ ग्रामपंचायतीच्या एकुण ४६ जागांसाठी रिंगणात असलेल्या ९६ उमेदवार भवितव्य उद्या ठरणार आहे.
तालुक्यातील चरवेली, फणसोप, शिरगाव आणि पोमेंडी बुद्रुक ग्रामपंचायतीच्या सार्वत्रिक निवडणुकांची घोषणा झाली. चरवेली गावात गाव पॅनल मार्फत निवडणूक बिनविरोध करण्याचा निर्णय घेण्यात आला. मात्र शिरगाव, फणसोप आणि पोमेंडी बुद्रुक या ठिकाणी निवडणुकीचे घमासान रंगणार आहे. तिन्ही ठिकाणी महाविकास आघाडी विरुद्ध भाजप आणि शिंदे गट युतीचा सामना रंगणार आहे. तर लक्षवेधी राहिलेल्या शिरगाव गावच्या सरपंच पदासाठी चौरंगी लढत रंगणार आहे. गेली दोन आठवडा गावपातलीवर प्रचाराचा धुरळा उडाला. आज गुप्त प्रचारावर भर दिला जाणार आहे. फणसोब ग्रामपंचायीतमध्ये ४ जागा बिनविरोध झाल्या आहेत. सरपंच पदासह उर्वरित ५ जागांसाठी निवडणुक होणार आहे. यामध्ये शिवसेना विरुद्ध शिंदे गट अशी जोरदार टक्कर होणार आहे.
पोमेंडी बुद्रुक ग्रामपंचायतीमध्ये शिवसेनेचे जोरदार वर्चस्व आहे. त्यामुळे तिथे सेनेची सत्ता येणार असे चित्र आहे. शिंदे गटाचेही काही प्रमाणात प्रयत्न सुरू आहे. तर शिरगांव ग्रामपंचायत निवडणुक महाविकास आघाडी आणि शिंदे गटाने प्रतिष्ठेची केली आहे. शिवसेनचे अनेक पदाधिकारी तेथे तळ ठोकून आहेत. तर उद्योग मंत्री उदय सामंत यांनीही या निवडणुकीत लक्ष घातले आहे. त्यामुळे सरपंच पदासाठी ४ उमेदवार रिंगणार आहे. त्यामुळे या निवडणुकीकडे सर्वांचे लक्ष आहे.
