जिल्हा परिषदेत होणार मच्छीमारांच्या प्रश्नांवर सविस्तर विचारमंथन
रत्नागिरी:- डिझेलच्या सातत्यपूर्ण दरवाढीमुळे आर्थिक संकटात सापडलेल्या रत्नागिरीतील मच्छीमारांसाठी कृषी व पशुसंवर्धन सभापती महेश नाटेकर यांनी तातडीची बैठक बोलावली आहे. बुधवार, २८ ऑक्टोबर रोजी सकाळी ११ वाजता जिल्हा परिषदेत होणाऱ्या या बैठकीत मच्छीमारांच्या प्रश्नांवर सविस्तर विचारमंथन करून पुढील रणनीती ठरवली जाणार आहे.
मासेमारी व्यवसायासाठी लागणाऱ्या डिझेलच्या दरामध्ये सतत वाढ होत असल्यामुळे रत्नागिरी जिल्ह्यातील पारंपरिक आणि आधुनिक मासेमारी करणाऱ्या मच्छीमारांना तसेच स्थानिक मच्छीमार सहकारी संस्थांना मोठ्या आर्थिक व व्यावहारिक अडचणींना सामोरे जावे लागत आहे. या गंभीर समस्येची दखल घेत गुहागरचे शिवसेना जिल्हा परिषद सदस्य व कृषी-पशुसंवर्धन सभापती महेश नाटेकर यांनी पुढाकार घेऊन ही विशेष बैठक बोलावली आहे.
ही महत्त्वाची बैठक बुधवार, दिनांक २८ ऑक्टोबर रोजी सकाळी ११ वाजता जिल्हा परिषदेतील कृषी सभापतींच्या दालनात पार पडणार आहे. या बैठकीमध्ये डिझेल दरवाढीचा मासेमारी व्यवसायावर होत असलेला विपरीत परिणाम, राज्य व केंद्र शासनाकडून मिळणाऱ्या सवलती आणि शासनाकडे करावयाच्या उपाययोजना यावर सविस्तर चर्चा केली जाणार आहे. तसेच मच्छीमार संघटनांच्या वतीने या प्रश्नावर कशा पद्धतीने पाठपुरावा केला जावा, याबाबतची दिशा या बैठकीत निश्चित केली जाईल.
जिल्ह्यातील मच्छीमारांच्या समस्या सोडवण्यासाठी आणि शासनाकडे ठोस पाठपुरावा करण्याच्या दृष्टीने रत्नागिरी जिल्ह्यातील सर्व मच्छीमार सहकारी संस्थांच्या अध्यक्षांनी व पदाधिकाऱ्यांनी या महत्त्वपूर्ण बैठकीला उपस्थित राहावे, असे आवाहन सभापती महेश नाटेकर यांच्याकडून करण्यात आले आहे.
