ट्रक चालकविरोधात ग्रामीण पोलीस ठाण्यात गुन्हा दाखल
रत्नागिरी:- बेदरकारपणे ट्रक चालवून समोरून येणाऱ्या बोलेरोला धडक देत अपघात केला. याप्रकरणी अज्ञात ट्रक चालकविरोधात ग्रामीण पोलीस ठाण्यात गुन्हा दाखल करण्यात आला आहे. अपघाताची ही घटना रविवारी सकाळी 9 वा. सुमारास हातखंबा येथील वळणात घडली. या अपघातात बोलेरो चालकास गंभीर दुखापत झाली.
याबाबत जखमी बोलेरो चालक सदानंद जनार्दन साळवी (53,रा. काजूर्ली गुहागर ) यांनी तक्रार दिली आहे. त्यानुसार, रविवारी सकाळी ते आपल्या ताब्यातील बोलेरो (एमएच -08-डब्ल्यू -5094) घेऊन हातखंबा ते रत्नागिरी असा येत होता. त्याच सुमारास समोरून येणाऱ्या ट्रक (एमएच-14- एएस- 7536) वरील चालकाने विरुद्ध दिशेला येऊन साळवी यांच्या बोलेरोला मध्यभागी धडक देत अपघात केला. यात साळवी यांना गंभीर दुखापत झाली असून ट्रक चालकाने पळ काढला. याप्रकरणी अधिक तपास पोलीस हेड कॉन्स्टेबल कांबळे करत आहेत.
