रत्नागिरी:- विविध रंगातील बोलक्या भिंती, अंतर्गत भिंतींवर केलेली सजावट आणि मोठ्या अक्षरातील अंक, पाण्यापासून ते आसनव्यवस्थेपर्यंतच्या दर्जेदार सुविधा, बैठ्या खेळाचे विविध साहित्य आणि असा साज असलेल्या शंभर स्मार्ट अंगणवाड्या जिल्ह्यात तयार झाल्या आहेत. त्याचा फायदा अंगणवाडीतील बालदोस्तांना होत असून भिंतींवरील चित्रांमुळे अंक, अक्षरांची ओळख होऊ लागली आहे.पहिल्या टप्प्यात १०० अंगणवाड्या स्मार्ट झाल्या असून अजुन शंभर अंगणवाड्यांसाठी १ कोटी ६५ लाख रुपये मंजुर झाले आहेत.
जिल्ह्यात नव्याने बांधण्यात येणार्‍या अंगणवाडींच्या बांधकामासाठी शासनाकडून निधी उपलब्ध करुन दिला आहे. नवीन अंगणवाड्यांना ‘बाला’ या संकल्पनेतून स्मार्ट करण्यात येत आहे. त्यात अंगणवाडी केंद्राला थ्रीडी पेंटिंग केले जात आहे. हॉल, किचनसह अन्य सुविधा दिल्या जात आहेत. अंगणवाडी केंद्रामध्ये लहान मुलांना आकर्षित करण्यासाठी फळे, फुले, कार्टून, प्राणी, शैक्षणिक तक्ते तसेच आतुन आणि बाहेरून थ्रीडी पेंटिंग केली आहेत. हॉलमध्ये चारही बाजूंनी काळा रंग देवून भिंतीलाच फळ्याचे रूप दिले जाईल. टीव्ही, वजनकाटा चार्जिंग पॉइंट काढण्याच्या सुचना आहेत. अंगणवाडी केंद्राबाहेर ग्राऊंडवर सी-सॉ, घोडा-हत्ती, घसरगुंडी हे साहित्य ठेवले आहे. बालकांना शब्दांपेक्षा चित्रांची भाषा अधिक चांगली कळते. या अनुषंगाने बिल्डिंग अ‍ॅज लर्निंग एड म्हणजेच बाला’ ही संकल्पना विकसित करण्यात आलेली आहे. या अंतर्गत अंगणवाडी परिसरात चित्रांच्या माध्यमातून विविध बाबी आकर्षक पद्धतीने रेखाटण्यात आल्या आहेत. पिण्याच्या पाण्यासाठी वॉटर प्युरिफायर लावण्यात येत आहेत. बालकांना स्वच्छतेच्या सवयी लावण्यासाठी स्वच्छतेचे साहित्य पुरवले जाणार आहे. अंगणवाडी केंद्राबाहेर कुंड्यांमध्ये फुलांची झाडे, छोटी रोपटे लावण्याच्या सुचना आहेत.
जिल्हा परिषद महिला व बाल विकास विभागामार्फत गेल्या दोन वर्षात शंभर अंगणवाड्या स्मार्ट बनविण्यात आल्या आहेत. त्यामध्ये दिलेल्या सुविधांचा अंगणवाडीमध्ये येणार्‍या बालदोस्तांना फायदा झाला आहे. अंक, अक्षरे यांची ओळख या ठिकाणी सहजरितीने होत आहे. भिंतींवरील चित्रांमुळे प्राण्यांची, फळे व फुलांची ओळख होते. रंग कोणते आहेत, याचीही ओळख अंगणवाडीमध्ये करुन दिली जात आहे. ग्रामीण भागातील प्रत्येक मुल पहिलीमध्ये जाण्यापुर्वीच वाचन, लिखाणाचे धडे घेत आहे. पहिलीला श्रीगणेशा करणारी मुले अंगणवाडीमध्येच स्मार्ट बनून पुढे जाणार आहेत. दुसर्‍या टप्प्यात शंभर अंगणवाड्या स्मार्ट बनविण्यात येणार आहेत. त्यासाठी शासनाकडून निधी मंजूर झाला आहे.
