रत्नागिरी:- पोषण ट्रॅकरचे काम उत्कृष्ट पद्धतीने केल्याने अंगणवाडी सेविका, मदतनीस यांना देण्यात येणारा प्रोत्साहन भत्ता थेट बँक खात्यात जमा करण्याची घोषणा महिला व बाल विकास विभागाकडून करण्यात आली आहे. त्यासाठी सुमारे ५१ कोटी रुपयांचा निधी राज्य सरकारने वितरित केला असून रत्नागिरी जिल्ह्यातील ४ हजार अंगणवाडी सेविका व मदतनीस याचा लाभ मिळणार आहे.
सदोष मोबाईलमुळे अनेक अंगणवाडी सेविका आणि मदतनीसांनी एकात्मिक बालविकास विभागाकडे मोबाईल परत केले आहेत, त्यामुळे अनेक सेविकांकडे मोबाईल नाहीत, काहीजणींच्या मोबाईलचा रिचार्ज नाही, अनेकींना पोषण ट्रॅकरचा वापर आजही नीट करता येत नाही, वरिष्ठ अधिकारी नीट माहिती देत नाहीत, मग प्रोत्साहन भत्ता कुणाला आणि कसा मिळणार असा प्रश्न सेविका आणि मदतनीसांकडून केला जात आहे. राज्यातील ३६ जिल्ह्यातील ५५३ तालुक्यातील अंगणवाडी सेविका आणि मदतनीसांना या निर्णयामुळे अनुक्रमे प्रत्येकी ५०० रुपये आणि २५० रुपये दरमहा प्रोत्साहन भत्ता मागील थकबाकीसह उपलब्ध होणार आहे. १ एप्रिल २०२१ ते ३१ ऑक्टोबर २०२१ या ७ महिन्यांच्या कालावधीसाठी सदर प्रोत्साहन भत्ता अंगणवाडी सेविका आणि मदतनीस यांच्या थेट बँक खात्यावर देण्याबाबतचा निर्णय घेण्यात आला आहे.
राज्याच्या कानाकोपर्यातील अंगणवाडी केंद्रातून ० ते ६ वयोगटातील मुले, गर्भवती महिला, स्तनदा माता यांना सकस पोषण आहार दिला जातो. याद्वारे दररोज जवळपास ७६ लाख लाभार्थ्यांपर्यंत शासन पोहोचत आहे. ३६ जिल्ह्यातील ५५३ तालुक्यातील अंगणवाड्यामधून पोषण आहार देत असतानाच पोषण ट्रॅकर या अॅपच्या माध्यमातून लहान मुलांची, तसेच नवजात शिशुच्या पोषणाची, वाढीचीही नोंद ठेवली जाते.
या मुलांचे वजन, उंची आदीबाबतची माहिती अॅपच्या माध्यमातून अद्ययावत केली जाते. त्यानुसार या मुलांकडे लक्षही दिले जाते. या पोषण करपमधून मुलांच्या सर्वांगीण विकासासाठी झटणार्या, कुपोषण कमी करण्यासाठी प्रयत्नशील आणि मदतनीसांना हा प्रोत्साहन भत्ता देण्याची घोषणा महिलाव बालविकास विभागाने केली आहे.
