तत्कालीन शल्य चिकित्सक चावी गेले घेऊन; कुलूप तोडण्याचा निर्णय
रत्नागिरी:- तत्कालीन जिल्हा शल्य चिकित्सकांनी कुलपाची चावी न दिल्याने निवासस्थानाचा प्रश्‍न कायम आहे. नवनियुक्त शल्य चिकित्सकांनी याबाबत सार्वजनिक बांधकाम विभाग आणि जिल्हाधिकार्‍यांना पत्र दिले आहे. दोन महिने होऊन गेले तरी चावी न मिळाल्याने कोविडच्या गंभीर कालावधीत निवासस्थानाचे कुलुप फोडण्यापर्यंत निर्णय झाल्याचे समजते.
शल्य चिकित्सकांच्या निवासस्थानाचा (बंगला) वाद काही मिटता मिटेना. तत्कालीन शल्य चिकित्सक डॉ. अशोक बोल्डे यांची सोलापूरला विनंती बदली होऊन 2 महिने झाले तरी त्यांनी निवासस्थान सोडलेले नाही. रुग्णालय प्रशासनाने वारंवार सूचना देऊनही त्यांनी बंगल्याची किल्ली न दिल्याने नवीन शल्य चिकित्सक डॉ. संघमित्रा फुले यांच्यासमोर पेच निर्माण झाला आहे. कोविडचा प्रादुर्भाव वाढलेल्या कालावधीमध्ये जिल्हा शल्य चिकित्सक पदावरून वाद सुरू झाला. शल्य चिकित्सक डॉ. बोल्डे असताना त्यांचा पदभार डॉ. संघमित्रा फुले यांच्याकडे देण्यात आला. यावरून शल्यचिकित्सक पदाची संगीत खुर्ची झाली होती; मात्र डॉ. बोल्डे यांची याच काळात सोलापूर येथे विनंती बदली झाली तर डॉ. फुले यांची रत्नागिरी जिल्हा शल्यचिकित्सक म्हणून रीतसर आरोग्य विभागाने नियुक्ती केली. यामुळे त्या वादावर पडदा पडला.
बोल्डे यांची बदली सोलापूरला झाल्यानंतर 5 ऑक्टोबरला त्यांना कार्यमुक्त केले; मात्र दोन महिने झाले तरी अद्याप त्यांनी शासकीय निवासस्थान सोडलेले नाही. निवासस्थानाची किल्ली त्यांच्याकडे असल्याने विद्यमान शल्यचिकित्सकांना बंगल्यापासून वंचित राहावे लागले आहे. चावी मिळत नसल्याने डॉ. फुले यांनी सार्वजनिक बांधकाम विभाग आणि जिल्हाधिकार्‍यांना पत्र देऊन बंगला ताब्यात मिळण्याची विनंती केली आहे. वेळप्रसंगी निवासस्थानाचे कुलुप फोडण्यापर्यंत विषय गेला आहे.
