रत्नागिरी:- जिल्हा रुग्णालयात गेल्या चार ते पाच महिन्यांपासून इमारतीच्या डागडुजीचे काम, रंगकाम करणे अशी विविध कामे हाती घेण्यात आली आहे. जिल्हा शल्यचिकित्सक डॉ. जगताप यांनी कार्यभार स्वीकारल्यानंतर रुग्णालय सुधारण्याकडे लक्ष केंद्रित केले आहे. मात्र, यातच आता रुग्णालयातील एक -एक प्रकार समोर येत आहे. रुग्णांच्या नातेवाईकांसाठी असणारे प्रतीक्षालय कक्ष बंद असल्याने गैरसोय निर्माण होत आहे.
या पूर्वी या शासकीय रुग्णालयातील ढिसाळ कारभाराचे एक एक किस्से जगजाहीर होत होते. मात्र, आता रुग्णालयाला नवे जिल्हा शल्यचिकित्सक मिळाल्याने ढिसाळ कारभारात सुधारणा होत आहेत. रूग्णालयात रुग्णांच्या नातेवाईकांसाठी दोन प्रतीक्षालय कक्ष निर्माण करण्यात आले आहेत. मात्र, ते बंद अवस्थेत असल्याने नातेवाईकांना आराम किंवा बसण्यासाठी बाहेरील आंब्याच्या झाडाचा आसरा घ्यावा लागत आहे. तसेच काही नातेवाईक वॉर्डच्या बाहेर लादीवर बसून राहतात. परंतु, नातेवाईकांसाठी नव्या इमारतीत तयार करण्यात आलेल्या जिन्याच्या दोन्ही बाजूच्या प्रतीक्षालय कक्षांना साखळीचे कुलूप लावल्याचे पाहायला मिळत आहे.
रुग्णांच्या नातेवाईकांसाठी निर्माण केलेली दोन्ही प्रतीक्षालय कक्ष बंद ठेवण्यात आली आहे. एका प्रतीक्षालय कक्षात चक्क सामान भरून ठेवण्यात आले आहे तर दुसर्‍या प्रतीक्षालय कक्ष बैठक व्यवस्था असूनही ती खोली कुलूप लावून बंद ठेवण्यात आली आहे. येथील प्रशासन रुग्णांच्या नातेवाईकांचे देणंघेणं आहे की नाही? प्रतीक्षालय कक्ष सामान ठेवण्यासाठी की बसण्यासाठी? असे अनेक प्रश्न उपस्थित केले जात आहेत. कुलूप लावून बंद असलेली प्रतीक्षालय कक्ष तत्काळ सुरू करावी, अशी मागणी नागरिकांमधून केली जात आहे.
