21 पैकी 14 उमेदवार बिनविरोध; 19 नोव्हेंबरला मतदान
रत्नागिरी:- रत्नागिरी जिल्हा मध्यवर्ती सहकारी बँकेच्या सात जागांसाठी दि.19 नोव्हेंबरला निवडणूक होणार असून 14 उमेदवार रिंगणात असल्याने सरळ लढत होणार आहे. बुधवारी दुपारी 3 वाजता अर्ज मागे घेण्याची अंतिम मुदत संपल्यानंतर निवडणुकीचे चित्र अधिक स्पष्ट झाले आहे. यापूर्वी सहकार पॅनेलचे 21 पैकी 14 संचालक बिनविरोध निवडून आले आहेत.
विमुक्त जाती, भटक्या जमाती मतदारसंघातून सुरेश मारूती कांबळे विरूद्ध सचिन चंद्रकांत बाईत, मजूर संस्था मतदारसंघातून दिनकर गणपत मोहिते विरूद्ध राकेश श्रीपत जाधव, नागरी पतसंस्था मतदारसंघातून संजय राजाराम रेडीज विरूद्ध ॲड.सुजित भागोजी झिमण, दुग्धसंस्था मतदारसंघातून गणेश यशवंत लाखण विरूद्ध अजित रमेश यशवंतराव, रत्नागिरी तालुका मतदारसंघातून गजानन कमलाकर पाटील विरूद्ध प्रल्हाद महादेव शेट्ये, लांजा तालुका मतदारसंघातून आदेश दत्तात्रय आंबोळकर विरूद्ध महेश रवींद्र खामकर, गुहागर तालुका मतदारसंघातून अनिल विठ्ठल जोशी विरूद्ध चंद्रकांत धोंडू बाईत अशी सरळ लढत होणार आहे.
गेली अनेक वर्षे जिल्हा बँकेत चंद्रकांत बाईत संचालक म्हणून कार्यरत आहेत. यावेळी त्यांनी गुहागर तालुका मतदारसंघातून निवडणूक लढविण्याचा निर्णय घेतला आहे. मुलगा सचिन बाईत याला त्यांनी हक्काच्या विमुक्त जाती, भटक्या जमाती मतदारसंघातून उभे केले आहे. विद्यमान संचालक चंद्रकांत बाईत यांनी उघड बंडखोरी केल्याने जिल्हा बँक निवडणुकीतील रंगत अखेरच्या टप्प्यात वाढली आहे. बिनविरोध निवडीचे स्वप्न अपुरे राहिले आहे. अखेरच्या दिवशी एकाही उमेदवाराने अर्ज मागे घेतला नसल्याने सात जागांवर निवडणूक होणार आहे.
आज दि.11 नोव्हेंबरला उमेदवारांना निशाणीचे वाटप करून अंतिम मतदार यादी प्रकाशित करण्यात येईल. दि.19 नोव्हेंबरला सकाळी 8 ते सायंकाळी 5 या वेेळेत मतदान होईल. दि.21 नोव्हेंबरला सकाळी 9 वाजता मतमोजणीला प्रारंभ होणार आहे. सहकारचे जिल्हा उपनिबंधक डॉ.सोपान शिंदे हे निवडणूक निर्णय अधिकारी म्हणून काम पहात आहेत. मतदानकेंद्रे, मतमोजणी ठिकाण याबाबत येत्या दोन दिवसात अंतिम निर्णय घेतला जाणार आहे.
