मातब्बर आणि अनुभवी सदस्यांना पहिल्या टर्ममध्ये संधी
रत्नागिरी:- जिल्हा परिषदेच्या विषय समिती सभापती पदांच्या निवडीचा कार्यक्रम जाहीर झाला असून येत्या २५ मार्च रोजी ही महत्त्वपूर्ण निवडणूक पार पडणार आहे. या पार्श्वभूमीवर जिल्ह्याच्या राजकीय वर्तुळात मोठी हालचाल पाहायला मिळत असून संभाव्य नावांची जोरदार चर्चा सुरू झाली आहे.
जिल्हा परिषदेचे प्रशासन आणि धोरणात्मक निर्णय घेण्याच्या दृष्टीने विषय समित्यांचे सभापती पद अत्यंत महत्त्वाचे मानले जाते, त्यामुळे या पदांवर कोणाची वर्णी लागणार याकडे संपूर्ण जिल्ह्याचे लक्ष लागले आहे. सत्ताधारी पक्षाकडून अधिकृतपणे नावांची घोषणा अद्याप करण्यात आली नसली तरी, काही अनुभवी आणि निष्ठावान नावांवर शिक्कामोर्तब होण्याची शक्यता वर्तवण्यात येत आहे.
या संभाव्य नावांमध्ये चिपळूणच्या मयुरी शिर्के यांच्याकडे महिला व बालकल्याण समितीचे सभापती पद सोपवले जाण्याचे संकेत मिळत आहेत. महिलांच्या प्रश्नांची जाण आणि प्रशासकीय कामाचा अनुभव विचारात घेता त्यांच्या नावाची चर्चा आघाडीवर आहे. त्याचप्रमाणे रत्नागिरीचे प्रकाश रसाळ यांच्याकडे समाज कल्याण सभापती पदाची जबाबदारी दिली जाण्याची दाट शक्यता आहे. समाजातील वंचित घटकांसाठी राबवल्या जाणाऱ्या योजना प्रभावीपणे लोकांपर्यंत पोहोचवण्यासाठी रसाळ यांचे नाव चर्चेत आले आहे. राजापूर तालुक्यातील ज्येष्ठ नेते प्रकाश कुवळेकर यांच्या नावाचा विचार शिक्षण आणि अर्थ समितीसाठी केला जात असल्याचे समजते. जिल्ह्याचा शैक्षणिक दर्जा सुधारणे आणि अर्थसंकल्पीय नियोजनासाठी कुवळेकर यांच्या अनुभवाचा फायदा घेण्याचा पक्षाचा मानस असल्याचे दिसून येते.
गुहागर तालुक्यातून महेश नाटेकर यांच्याकडे कृषी सभापती पदाची धुरा दिली जाण्याची शक्यता आहे. कोकणातील शेती आणि बागायतदारांच्या प्रश्नांवर आक्रमकपणे भूमिका मांडणारे नेतृत्व म्हणून त्यांच्याकडे पाहिले जाते.
दुसरीकडे, जिल्हा परिषदेचे उपाध्यक्ष विलास चळके यांच्याकडे बांधकाम आणि आरोग्य या अत्यंत महत्त्वाच्या खात्यांची जबाबदारी सोपवली जाऊ शकते. ग्रामीण भागातील रस्त्यांचे जाळे आणि आरोग्य सुविधा अधिक बळकट करण्यासाठी चळके यांच्याकडे हे अधिकार राहतील असे सूत्रांकडून समजते. ही सर्व नावे सध्या प्राथमिक चर्चेत असून २५ मार्च रोजी होणाऱ्या निवडणुकीपूर्वी पक्षश्रेष्ठींकडून यावर अंतिम मोहोर उमटवली जाईल. सध्या तरी ही नावे संभाव्य असली तरी राजकीय समीकरणे आणि प्रादेशिक समतोल राखण्याच्या दृष्टीने याच नावांना पसंती मिळण्याची चिन्हे आहेत. या निवडीमुळे जिल्हा परिषदेच्या कामकाजाला नवी गती मिळण्याची अपेक्षा व्यक्त होत असून आगामी काळात विकासकामांचे नियोजन कसे राहते, हे पाहणे महत्त्वाचे ठरेल.
