रत्नागिरी:- जगबुडी नदीत एकाच दिवशी दोन मगरींचा मृत्यू झाला आहे. तसेच मागील तीन महिन्यात एकूण सहा मगरींचा मृत्यू झाला आहे. या घटनेने एकच खळबळ उडाली आहे. जगबुडी नदीत मोठ्या प्रमाणावर प्रदूषण झाले असून नदीमध्ये असणाऱ्या महाकाय मगरींचा एकापाठोपाठ एक मृत्यू होऊ लागला आहे.
26 जानेवारी रोजी जगबुडी नदीमध्ये भोस्ते आणि सुसेरी या दोन ठिकाणी दोन महाकाय मगरी मृतावस्थेत नदीपात्राबाहेर तरंगत असताना आढळल्या आल्या. जगबुडी नदीला नाल्याचे स्वरूप मिळाले आहे. या नदीतील मगरीच्या वाढत्या मृत्यूचे प्रमाण हा चिंतेचा विषय बनला आहे. मागील आठवड्यात जगबुडी नदी पात्रातील मटन मच्छी मार्केट शेजारी अशाच प्रकारे एक मगर मृताअवस्थेत आढळून आली होती. अशातच जगबुडी नदीमधील भोस्ते पूल तसेच सुसेरी गावानजीक अशा प्रकारे एकाच दिवशी दोन मगरींचा मृत्यू झाल्याची बाब समोर आली. नदीमधील वाढते प्रदूषण ही जलचरांसाठी डोकेदुखी ठरली आहे. महत्त्वाचे म्हणजे गेल्या काही महिन्यांमध्ये सहा मगरींचा मृत्यू झाल्याचे समोर आलेले आहे. काही मगरींना नदीच्या पात्रात जाळून त्यांच्यावर अंत्यविधी करण्यात आला.
