रत्नागिरी:- गणपतीपुळेत बुडून मृत्यू होऊ नये यासाठी पोहण्यास धोकादायक असलेल्या दोन ठिकाणी लाल रिबिन लावून ‘नो स्विमिंग झोन’ बनवण्यात आले आहेत. भरतीवेळी पाण्यात चाळ तयार होते आणि त्यात पर्यटक अडकून बुडतात. पोहणार्‍यांच्या सुरक्षेसाठी हे झोन बनवले असून किनार्‍यावर दहा जीवरक्षकांची नियुक्ती ग्रामपंचायतीतर्फे करण्यात आली आहे.
चार दिवसांपुर्वी सांगलीतील एका पर्यटकाचा गणपतीपुळे किनारी बुडून मृत्यू झाला तर एकाला जीवरक्षकांनी वाचवले. सध्या समुद्र खवळलेला असल्याने पोहणे धोकादायक आहे. मागील तिन वर्षात बुडून मृत पावल्याच्या घटना घडलेल्या नव्हत्या. कोरोनामुळे सध्या मंदिरे बंद आहेत. पर्यटनाला खिळ बसली असली तरीही काही पर्यटकांचा राबता सुुरु आहे. पर्यटकांच्या सुरक्षेसाठी जयगड पोलिस ठाणे, गणपतीपुळे ग्रामपंचायत आणि देवस्थान यांच्या संयुक्त विद्यमाने चर्चा झाली. बैठकीनंतर दोन दिवसात उपाय केले गेले. भरती-ओहोटीच्या वेळेनुसार समुद्रात खड्डा तयार होतो आणि त्यात पर्यटक सापडल्यास दुर्घटना घडते. सर्वसाधारणपणे हे प्रकार मंदिराच्या समोरील शंभर मीटरच्या भागात घडतात. तेथे लाल झेंड रोवून रिबीन्स लावण्यात आल्या आहेत. किनार्‍यावरील वॉच टॉवरजवळही असे प्रकार होतात. तो भागही नो स्विमिंग झोनमध्ये समाविष्ट केला आहे. तसेच एटीडीसीच्या मागील बाजूसही या पध्दतीने झोन बनविण्यात येणार आहे.
चाळ तयार होण्याची ठिकाणे बदलत असल्याने नो स्विमिंग झोन बदलतात. ती जबाबदारी जीवरक्षकांवर सोपवली आहे. सोमवारी (ता. 20) सकाळी साडेनऊ वाजण्याच्या सुमारा पुर्वी झेंड रोवले होते, त्याच्या बाजूला काही अंतरावर खड्डा पडला. ही बाब जीवरक्षकांच्या लक्षात आली होती. सुदैवाने पर्यटकांची संख्या कमी असल्याने त्या भागात कोणीच पोहायला गेलेले नव्हते. भविष्यात एकाही पर्यटकाचा बुडून मृत्यू होणार नाही याची काळजी पोलिस, ग्रामपंचायत आणि देवस्थानमार्फत घेत आहे. त्यासाठी दोन शिपमध्ये दहा जीवरक्षक नेमले आहेत. दरम्यान, किनार्‍यावरील बोटींगसेवा सुरु होईपर्यंत जीवरक्षकांना डोळ्यात तेल घालून लक्ष ठेवावे लागणार आहे. बोटींग सुरु झाले की बुडणार्‍यांना आपसूकच मदत मिळते. सध्या समुद्र खवळलेला असल्याने आणि कोरोना परिस्थितीमुळे बोटींग सेवा बंद ठेवण्यात आली आहे.
