खेड:- खेड शहरात डेंग्यू साथीचा फैलाव दिवसेंदिवस वाढत आहे . डेंग्यूची साथ आटोक्यात आणण्यासाठी नगर प्रशासनाचे शर्थीचे प्रयत्न सुरू आहेत.
तालुका वैद्यकीय अधिकारी कार्यालयाकडून सर्वेक्षण मोहीम हाती घेण्यात आली आहे . मात्र दिवसागणिक डेंग्यू रूग्णसंख्येत वाढ होत असून आतापर्यंत शहरातील विविध भागात डेंग्यूचे २२ रुग्ण आढळून आल्याची माहिती पुढे आली आहे . पूरस्थिती ओसरल्यानंतर नगर प्रशासनाने तातडीने स्वच्छता मोहीम हाती घेत परिसर चकाचक केला होता . याशिवाय पूरग्रस्त भागात जंतूनाशक फवारणीही केली होती . मात्र पूरस्थितीनंतर आजारांनी डोके वर काढले . त्यात साथीच्या डेंग्यूचे रूग्ण सर्वाधिक आढळून येत असल्याचे निदर्शनास आल्यानंतर तालुका वैद्यकीय अधिकारी कार्यालयाने ३० कर्मचाऱ्यांमार्फत सर्वेक्षण मोहीम हाती घेतली . डेंग्यू रूग्ण संख्या वाढू लागल्याने खडबडून जागे झालेल्या नगर प्रशासनाची जंतूनाशक फवारणीची मोहीम सुरूच आहे.
