रत्नागिरी:- बेदरकारपणे ओमनी चालवून पुढील रिक्षेला पाठीमागून धडक देत अपघात केल्याप्रकरणी चालकाविरोधात ग्रामीण पोलिस ठाण्यात गुन्हा दाखल करण्यात आला आहे. अपघाताची ही घटना मंगळवार १० ऑक्टोबर रोजी सायंकाळी ५.१५ वा. काळबादेवी पाथरदेव येथे घडली.
नंदकुमार शांताराम राणे (५५, रा. सणगरेवाडी कोतवडे, रत्नागिरी) असे गुन्हा दाखल करण्यात आलेल्या संशयित चालकाचे नाव आहे. तर या अपघातात रिक्षा चालक प्रसाद प्रकाश पाटील (रा. बसणी नागझरी, रत्नागिरी) हे जखमी झाले आहेत.
मंगळवारी सायंकाळी नंदकुमार आपल्या ताब्यातील ओमनी (एमएच- ०८-सी-४८९८) ही रत्नागिरी ते गणपतीपुळे जाणाऱ्या रस्त्यावरून भरधाव वेगाने जात होता. तो काळबादेवी पाथरदेव येथे आला असता त्याचा ओमनीवरील ताबा सुटल्यामुळे त्याने पुढील रिक्षा (एमएच- ०८ – एक्यु- ९०२२) ला पाठीमागून धडक देत अपघात केला. या अपघातात दोन्ही वाहनांचे नुकसान झाले असून, रिक्षा चालक प्रसाद पाटील जखमी झाले असून त्यांना उपचारासाठी घेऊन न जाता निघून गेला होता. याप्रकरणी ग्रामीण पोलिस ठाण्यात गुन्हा दाखल करण्यात आला आहे.
