रत्नागिरी:- रत्नागिरी जिल्ह्यात एसटी कर्मचारी संप सुरू असला तरी काही कर्मचारी सेवेत रुजू झाले आहेत. मात्र दापोली येथे असलेल्या एसटी बसवर शनिवारी रात्री ८ वा.सुमारास दगडफेक झाल्याने या संपाला गालबोट लागले आहे. ड्रायव्हर डाव्या बाजूस हा दगड लागला असुन सुदैवाने यात कोणीही जखमी झाले नाही. रस्त्याच्या साईडला उभ्या असलेल्या व तोंडाला रुमाल बांधून आलेल्या आज्ञाताने हा दगड मारला आहे.
शनिवारी २७ नोव्हेंबर रोजी ७:१५ वा.खेड येथुन सुटलेली दापोली डेपोची एसटी क्रमांक MH14 BT 2496 या एसटी बसवर सात प्रवासी घेऊन दापोलीकडे निघालेल्या बसवर ही दगडफेक झाली आहे. दापोलिकडे येत असताना टाळसूरे वाकण ते नवानगर दरम्यान ही दगडफेक झाली आहे. यावेळी खेड दापोली बसवर चालक ड्रायव्हर डी एस धोत्रे तर वाहक ए डी मुसळे हे कार्यरत होते. सार्वजनिक मालमत्तेचे नुकसान केल्याप्रकरणी आज्ञातावर गुन्हा दाखल करण्याची कार्यवाही दापोली पोलीस स्थानकात सुरू आहे.
दरम्यान दापोली एसटी आगारात निलंबित करण्यात आलेल्या १९ कर्मचाऱ्यांपैकी १६ कर्मचारी हजर झाले असून दोन जण गावी गेल्याने ते गावावरून आल्यावर हजर होण्याची शक्यता आहे. सार्वजनिक मालमत्ता नुकसान प्रकरणी आज्ञात इसमावर गुन्हा दाखल करण्यात आला आहे.
