रत्नागिरी:- शेतकर्‍यांप्रमाणे मच्छीमारांसाठी किसान क्रेडीट कार्ड योजनेचा लाभ देण्याचा निर्णय शासनाने घेतला. त्याचा लाभ घेण्यासाठी रत्नागिरी जिल्ह्यातील सात हजार मच्छीमारांनी सहाय्यक मत्स्य व्यावसाय कार्यालयाकडे प्रस्ताव सादर केले आहेत. आतापर्यंत शंभर मच्छीमारांनी बँकांकडून कर्ज उचलली आहेत. कोरोना कालावधीत नवीन हंगामात मच्छीमारी व्यवसाय कसा सुरु करायचा हा प्रश्‍न किसान क्रेडीटमुळे सुटला असून नौका, जाळी दुरुस्तीसह आवश्यक साहित्य खरेदीकरीता आर्थिक साह्य मिळाले.
केेंद्र शासनाच्या निर्णयानुसार भारतीय रिझर्व्ह बँकेने किसान क्रेडिट कार्ड देण्याचे परिपत्रक काढले आहे. शेतकर्‍यांप्रमाणे सागरी मच्छिमारांना ही योजना लागू केली आहे. शेतकर्‍यांना पिकांसाठी लागणारे खेळते भांडवल कर्ज रुपाने मिळते. ते पाच वर्षाच्या कालावधीत परत करावयाचे असते. देशातील सर्व बँकाना हे कृषी कर्ज देणे बंधनकारक आहे. दुष्काळ पडल्यास हे कर्ज फेडीसाठी शासनाकडून मुदतवाढ वा कर्ज माफी मिळते. त्याप्रमाणे किसान क्रेडिट कार्डमुळे मासेमारीसाठी लागणार्‍या खर्चासाठीही अर्थसाह्य मिळणार आहे. मच्छीमारांना बोटीची दुरुस्ती व नवीन जाळी खरेदी, इंजिन दुरुस्ती, पहिल्या ट्रीपला डिझेल, बर्फ आदींसाठी सावकार व मासळी व्यापार्‍यांकडून व्याज आणि कमिशनवर रक्कम घ्यावी लागते. मंजूर रकमेतून गरजेनुसार रक्कम काढून वापर करावा आणि मासळी विक्री झाल्यास रक्कम भरायची असते. पुन्हा लागेल तेव्हा रक्कम उचल करता येते. कर्जरुपात काढलेली रक्कम भरली की व्याज बंद होते. जेवढी रक्कम उचल करू, त्या रकमेवर 7 टक्के व्याज आकारले जाते. वेळोवेळी रक्कम भरल्यास शासनाकडून सानुग्रह अनुदान म्हणून व्याज माफ होते.
शासनाच्या निर्णयानुसार किसान कार्डसाठी इच्छुकांची यादी मच्छीमार सोसायटींकडून मागविण्यात आली होती. ज्यांना आर्थिक गरज आहे, अशा जिल्ह्यातील 7 हजार मच्छीमारांनी प्रस्ताव मत्स्य विभागाकडे सादर केले. ती यादी कर्ज मंजुरीसाठी बँकांकडे पाठवली गेली. ऑगस्टच्या पहिल्या आठवड्यात अनेक मच्छीमारांना व्यावसाय सुरु करण्यासाठी आर्थिक गरज होती. त्यातील शंभर मच्छीमारांनी किसान क्रेडीड योजनेतून कर्ज उचलली. कोरोनामुळे गतवेळच्या हंगामात मच्छीमारांची आर्थिक घडी कोलमडली होती. त्यामुळे हंगामाच्या सुरवातीला लागणारी आर्थिक गरज बँकांकडून मिळालेल्या या मदतीने झाली. यामध्ये मोठ्या नौकेला अडीच लाख तर छोट्या नौकेला दीड लाखापर्यंत कर्ज मिळते. हे लाभार्थी जिल्हा मध्यवर्ती बँक ठरवते. सप्टेंबरला पर्ससिननेट मच्छीमारी सुरु होणार आहे, त्यांनाही किसान क्रेडिटचा आधार महत्त्वाचा ठरणार आहे.
—
कोट
मच्छीमारांसाठी सुरु केलेल्या किसान क्रेडीट कार्ड योजनेचा लाभ मच्छीमारांना देण्यात येत आहे. त्यासाठी सोसायटींकडून यादी मागविली होती. ती यादी बँकांकडे देण्यात आली आहे. आवश्यकता असलेले मच्छीमार कर्जरुपात त्याचा लाभ घेत आहेत. कर्ज उचलण्याचा हा प्रकार सीसी स्वरुपातील आहे.
– एन. व्ही. भादुले, सहाय्यक मत्स्य व्यवसाय अधिकारी.
