रत्नागिरी ग्रामीण पोलिसांकडून कारवाई
रत्नागिरी:- हातखंबा ते रत्नागिरी या मुख्य मार्गावर निष्काळजीपणे दुचाकी चालवून अन्य वाहनचालकांच्या सुरक्षेला धोका निर्माण केल्याप्रकरणी तीन दुचाकीस्वारांविरुद्ध रत्नागिरी ग्रामीण पोलिस ठाण्यात गुन्हा दाखल करण्यात आला आहे. या घटना मंगळवारी (ता. १३) सायंकाळी साडेसात ते आठच्या सुमारास हा प्रकार निदर्शनास आला. या कारवाईमुळे मुख्य रस्त्यावरून प्रवास करताना वाहतूक नियमांचे पालन न करणाऱ्या वाहनचालकांचा प्रश्न पुन्हा ऐरणीवर आला आहे.
पल्लवी चेतन पानगले (वय ३१, रा. नॅनोसिटी, कारवांचीवाडी, रत्नागिरी), दशरथ भागा पवार (वय ६३, रा. रवींद्रनगर, कुवारबाव, रत्नागिरी) आणि अब्दुल मेहबुब कोगू (वय ४२, रा. श्रीनगर, कारवांचीवाडी, रत्नागिरी) अशी गुन्हा दाखल झालेल्या संशयित दुचाकीस्वारांची नावे आहेत. पोलिसांकडून मिळालेल्या माहितीनुसार, मंगळवारी सायंकाळी हातखंबा ते रत्नागिरी या मुख्य मार्गावर हे तिघे दुचाकी चालवत असताना निष्काळजीपणे वाहन चालविल्याचे निदर्शनास आले. त्यांच्या वाहन चालविण्याच्या पद्धतीमुळे रस्त्यावरून ये-जा करणाऱ्या अन्य वाहनांना धोका निर्माण होण्याची शक्यता होती. त्यामुळे वाहतुकीच्या सुरक्षिततेच्या दृष्टीने या प्रकाराची पोलिसांनी दखल घेतली.
या प्रकरणी महिला पोलिस हेड कॉन्स्टेबल सुगंधा दळवी आणि महिला पोलिस हवालदार मनिषा होरंबे यांनी रत्नागिरी ग्रामीण पोलिस ठाण्यात तक्रार दिली. या तक्रारीच्या आधारे पोलिसांनी तिन्ही संशयित दुचाकीस्वारांविरुद्ध गुन्हा दाखल केला आहे. हातखंबा ते रत्नागिरी हा मार्ग वाहनांच्या वर्दळीचा असल्याने या रस्त्यावरून प्रवास करताना वाहनचालकांनी वेगावर नियंत्रण ठेवणे आणि वाहतुकीच्या नियमांचे पालन करणे आवश्यक आहे. निष्काळजीपणे वाहन चालविल्यामुळे संबंधित वाहनचालकांसह रस्त्यावरील इतर प्रवाशांच्याही सुरक्षिततेला धोका निर्माण होऊ शकतो. त्यामुळे वाहन चालवताना आवश्यक ती खबरदारी घेण्याचे महत्त्व या घटनेतून अधोरेखित झाले आहे.
