परिसरात धुराचे साम्राज्य; आग विझवण्यासाठी शर्थीचे प्रयत्न
रत्नागिरी:- रत्नागिरी शहरातील प्रवेशद्वार असलेल्या साळवी स्टॉप येथील कचरा डेपोला गुरुवारी पुन्हा अचानक मोठी आग लागल्याची घटना घडली. या आगीमुळे परिसरात धुराचे मोठे लोळ पसरले. दुपारच्या सुमारास लागलेल्या या आगीमुळे नागरिकांमध्ये भीतीचे वातावरण निर्माण झाले होते. मात्र, आगीची माहिती मिळताच येथील नगरसेवक सौरभ मलुष्टे यांनी नगर परिषदेच्या अग्निशमन यंत्रणेसह घटनास्थळी धाव घेत आगीवर नियंत्रण मिळवण्याचे काम सुरू केले.
साळवी स्टॉप येथील कचरा संकलन केंद्रात (डेपो) साठवलेल्या कचऱ्याला ही आग लागली. कचऱ्यामध्ये प्लास्टिक आणि सुक्या वस्तूंचे प्रमाण असल्याने आगीचा भडका लवकर उडाला. आगीची तीव्रता जास्त असल्याने दूरवरून धूर दिसत होता. घटनेचे गांभीर्य ओळखून नगरसेवक सौरभ मलुष्टे यांनी अग्निशमन यंत्रणेला पाचारण केले. रत्नागिरी नगरपालिकेचा अग्निशमन बंब तातडीने घटनास्थळी दाखल झाला. अग्निशमन दलाचे जवान पाण्याचा मारा करून आग आटोक्यात आणण्यासाठी शर्थीचे प्रयत्न केले. आग आणखी पसरू नये, यासाठी खबरदारी घेतली जात आहे.
या घटनेची माहिती मिळताच स्थानिक नगरसेवक सौरभ मलुष्टे यांनी तत्काळ घटनास्थळी धाव घेतली. ते स्वतः उपस्थित राहून अग्निशमन दलाच्या कामावर देखरेख करत होते आणि प्रशासनाला आवश्यक त्या सूचना देत होते. परिस्थिती लवकरात लवकर नियंत्रणात यावी यासाठी ते प्रयत्नशील होते. आगीचे नेमके कारण अद्याप समजू शकलेले नाही.
