रत्नागिरी:- परटवणे येथून साळवी स्टॉपच्या दिशेने निघालेल्या क्रीडा शिक्षकाला वाटेतच मृत्यूने गाठले. उद्यमनगर, चंपक मैदानासमोर रस्त्यात गुराला धडकून दुचाकीस्वार क्रीडा शिक्षक ओंकार बाणे रस्त्यात कोसळला. रस्त्यावर डोकं जोरात आपटल्याने ओंकार बाणे याचा उपचारा दरम्यान मृत्यू झाला.
सोमवारी रात्री साडेअकरा वाजण्याच्या सुमारास हा अपघात झाला. ओंकार बाणे रात्री साडेदहा वाजेपर्यंत घरीच होता. रात्री तो त्याची दुचाकी घेऊन शहरात आला. रात्री घरी जाण्यासाठी निघाला असताना साडेअकरा वाजण्याच्या सुमारास उद्यमनगर चंपक मैदानासमोर गुराला धडकल्याने त्याच्या दुचाकीचा गंभीर अपघात झाला. बराच वेळ तो रस्त्यात पडलेल्या अवस्थेत होता. यानंतर त्याला उपचारासाठी जिल्हा रुग्णालयात दाखल करण्यात आले होते. मात्र उपचारा दरम्यान त्याचा मृत्यू झाला.
ओंकार खोखो, कबड्डी, क्रिकेट या खेळात निपुण होता. गोगटे जोगळेकर कॉलेज मध्ये गेल्या 6 वर्षा पासून क्रीडा शिक्षक म्हणून कार्यरत होता. त्याच्या मृत्यूची बातमी समजल्यावर शेकडोंच्या संख्येने तरुण वर्गाने शासकीय रुग्णालयात धाव घेतली.
