रत्नागिरी:- रत्नागिरी जिल्हा मध्यवर्ती सहकारी बँकेच्या सात जागांसाठी 14 उमेदवारांचे भवितव्य मतपेटीत बंद झाले. दिवसभरात 87.45 टक्के मतदान झाले. 21 नोव्हेंबरला सकाळी 9 वाजल्यापासून जिल्हा नगर वाचनालयाच्या दुसर्‍या मजल्यावर मतमोजणीला सुरूवात होणार आहे. दोन तासात सर्व जागांची मतमोजणी पूर्ण होईल अशी अपेक्षा वर्तवली जात आहे.
जिल्ह्यात मतदानांसाठी नऊ केंद्र ठेवण्यात आली होती. सकाळी 8 वाजल्यापासून मतदानाला सुरवात झाली. बँकेच्या एकवीसपैकी सहकार पॅनेलचे 14 उमेदवार बिनविरोध निवडून आले होते. मंडणगड तालुक्यात 36 पैकी 34 (94.44 टक्के), दापोली तालुक्यात 105 पैकी 97 (92.38 टक्के), खेड तालुक्यात 129 पैकी 115 (89.15 टक्के), चिपळूण तालुक्यात 216 पैकी 190 (87.96 टक्के), गुहागर तालुक्यात 56 पैकी 52 (92.86 टक्के) संगमेश्‍वर तालुक्यात 105 पैकी 87 (82.86 टक्के), रत्नागिरी तालुक्यात 192 पैकी 153 (79.69 टक्के), लांजा तालुक्यात 72 पैकी 70 (97.22 टक्के), राजापूर तालुक्यात 85 पैकी 73 (85.88 टक्के) मतदान झाले. एकूण 996 पैकी 871 (87.45 टक्के) मतदान झाले आहे. लांजा तालुक्यात सर्वाधिक तर रत्नागिरी तालुक्यात सर्वात कमी मतदान झाले आहे.
जिल्हास्तरावरून सर्व मतदान यंत्रे एकत्र करून मतमोजणीच्या ठिकाणी ठेवण्यात आली आहेत. जिल्हा नगरवाचनालयाच्या मतदान केंद्राबाहेर संचालक ॲड.दीपक पटवर्धन, रामचंद्र गराटे, माजी जिल्हा परिषद उपाध्यक्ष सतिश शेवडे, माजी नगराध्यक्ष राहुल पंडित, भाजपा तालुकाध्यक्ष मुन्ना चवंडे, शिवसेनेचे पदाधिकारी आदी मोठ्या संख्येने उपस्थित होते.
हे आहेत उमेदवार!
विमुक्त जाती, भटक्या जमाती मतदारसंघातून सहकार पॅनेलचे सुरेश मारूती कांबळे विरूद्ध सचिन चंद्रकांत बाईत, मजूर संस्था मतदारसंघातून सहकार पॅनेलचे दिनकर गणपत मोहिते विरूद्ध राकेश श्रीपत जाधव, नागरी पतसंस्था मतदारसंघातून सहकार पॅनेलचे संजय राजाराम रेडीज विरूद्ध अ‍ॅड. सुजित भागोजी झिमण, दुग्धसंस्था मतदारसंघातून सहकार पॅनेलचे गणेश यशवंत लाखण विरूद्ध अजित रमेश यशवंतराव, रत्नागिरी तालुका मतदारसंघातून सहकार पॅनेलचे गजानन कमलाकर पाटील विरूद्ध प्रल्हाद महादेव शेट्ये, लांजा तालुका मतदारसंघातून सहकार पॅनेलचे आदेश दत्तात्रय आंबोळकर विरूद्ध महेश रवींद्र खामकर, गुहागर तालुका मतदारसंघातून सहकार पॅनेलचे अनिल विठ्ठल जोशी विरूद्ध चंद्रकांत धोंडू बाईत अशी लढत झाली आहे.
