खेड:- खेड तालुक्यात एकाच दिवशी एकाच वाडीत तब्बल 27 जणांना कोरोनाची लागण झाली आहे. यातील 25 जण एकाच कुटुंबातील आहेत तर 2 अन्य जण आहेत. एकाच दिवशी इतक्या मोठया प्रमाणावर रुग्ण सापडल्याने आरोग्य यंत्रणा अलर्ट झाली आहे.
कोरोना चा प्रादुर्भाव कमी होत चालला असताना खेड तालुक्यातील ग्रामीण भागात पुन्हा कोरोना शिरकाव झाला आहे. आंबवली वरवली धुपे वाडीतील तब्बल २७ जणांचा कोरोना अहवाल पॉझिटिव्ह आला असल्याची माहिती येथील तालुका वैद्यकीय अधिकारी डॉ. शेळके यांनी दिली. एकाच वेळी इतक्या मोठ्या प्रमाणात कोरोना चे रुग्ण आढळून आल्याने आरोग्य यंत्रणा हादरून गेली असून यंत्रणेने या गावात तळ ठोकत सर्वेक्षण हाती घेतले आहे.
याबाबत आरोग्य विभागाकडून देण्यात आलेल्या माहिती नुसार ९ फेब्रुवारी रोजी वरवली धुपेवाडी मधील एक रुग्ण आंबवली प्राथमिक आरोग्य केंद्रात उपचारासाठी दाखल झाला होता. त्याचे नमुने घेतले असता त्याचा अहवाल पॉझिटिव्ह आल्याने त्या रुग्णाच्या सम्पर्क मधील ४७ जणांचे स्वॅब घेण्यात आले होते. त्यांचा अहवाल रविवारी रात्रौ उशिरा येथील आरोग्य विभागाला प्राप्त झाला असता त्यामध्ये तब्बल २७ जणांना कोरोनाचा प्रादुर्भाव झाला असल्याची बाब उघड झाली.
वरवली धुपेवाडी लोकसंख्या १५० इतकी असून संपर्कातील वाड्या ठाणकेश्वरवाडी,सुतारवाडी, देऊळवाडी, गावठाणवाडी , धनगरवाडी या वाड्या चे सर्वेक्षण चे काम हाती घेण्यात आले आहे. वरवली धुपेवाडी मध्ये आढळून आलेल्या ६० वर्षावरील १०-१५ वर्षा खालील १ पुरुष १४ स्त्री १३ एकुण रुग्ण २७ रुग्ण आढळून आले. दरम्यान प्राप्त अहवालात न्यू इंग्लिश स्कूल व ज्युनिअर कॉलेज आंबवली येथील एका विद्यार्थ्याचा अहवाल पॉझिटिव्ह आल्याने १५ ते २० फेब्रुवारी या कालावधीत महाविद्यालय बंद ठेवण्यात आले आहे. तशा सूचना शाळेकडून विध्यार्थ्यांना देण्यात आले आहे. दरम्यान, या अहवाला नंतर वैद्यकीय अधिकारी डॉ. शेळके यांच्यासह कर्मचाऱ्यांनी वरवली गाव गाठून उपाययोजना सुरू केली आहे.
