लांजा:- तालुक्यातील ६० ग्रामपंचायतींच्या सरपंचपदाची आरक्षण सोडत सोमवारी १४ जुलै रोजी लांजा तहसील कार्यालयाच्या सभागृहात काढण्यात आली. यामध्ये सर्वसाधारणसाठी २०, सर्वसाधारण स्त्रीसाठी २०, नागरिकांचा मागास प्रवर्गासाठी ८, नागरिकांचा मागास प्रवर्ग स्त्रीसाठी ८, तर अनुसूचित जाती आणि अनुसूचित जाती स्री प्रवर्गासाठी प्रत्येकी २ याप्रमाणे ६० ग्रामपंचायतीच्या सरपंचपदाचे आरक्षण यावेळी काढण्यात आले.
लांजा तालुक्यातील एकूण ६० ग्रामपंचायतींच्या सरपंचपदाच्या आरक्षण सोडतीचा कार्यक्रम सोमवारी १४ जुलै रोजी लांजा तहसील कार्यालयाच्या सभागृहात पार पडला. यावेळी व्यासपीठावर लांजा तहसीलदार प्रियांका ढोले, निवासी नायब तहसीलदार अनिल गोसावी, महसूल नायब तहसीलदार सुरेंद्र भोजे, निवडणूक नायब तहसीलदार जीवन देसाई, तसेच पुनस मंडळ अधिकारी रोहिदास राठोड, भांबेड मंडळ अधिकारी महादेव चव्हाण यांच्यासह सहाय्यक महसूल अधिकारी प्रांजल जोशी, महसूल सहाय्यक कविता सिदमब – सावंत, रिया कोटकर, कल्पना गायकवाड, ज्योती चौरे, तेजस दुडये आदी उपस्थित होते. ही आरक्षण सोडत लांजा जिल्हा परिषद शाळा क्र. ५ मधील इयत्ता पाचवीत शिकणारा विद्यार्थी कु. आयुष्य दीपक कांबळे याच्या हस्ते काढण्यात आली.
यावेळी काढण्यात आलेले सरपंचांचे आरक्षण पुढीलप्रमाणे: तालुक्यातील एकूण ६० पैकी २० ग्रामपंचायतीच्या सरपंच पदाचे आरक्षण सर्वसाधारण काढण्यात आले आहे. यामध्ये ग्रामपंचायत झापडे, शिरवली, तळवडे, कुर्णे, प्रभानवल्ली, माजळ, कोचरी, कोट, वाडगाव, विवली, सालपे, भांबेड, आडवली, हर्चे, भडे, वेरवली बुद्रुक, बेनी खुर्द, वाघणगाव, विलवडे, पन्हळे या ग्रामपंचायतींचा समावेश आहे. त्याचप्रमाणे सर्वसाधारण स्री प्रवर्गासाठी देखील २० ग्रामपंचायतीचे आरक्षण ठेवण्यात आले आहे. यामध्ये रावारी, कुरचुंब, वेरवली खुर्द, कोंडये, इंदवटी, कोंडगे, गोविळ, कोल्हेवाडी, साटवली, पुनस, खानवली, वाघ्रट, कोलधे, खोरनिनको, बेनी बुद्रुक, वाकेड, उपळे, पालू, इसवली, कणगवली या ग्रामपंचायतींचा समावेश आहे.
नागरिकांचा मागास प्रवर्ग स्त्री प्रवर्गासाठी ८ ग्रामपंचायती आरक्षित झाल्या आहेत. या ग्रामपंचायतींमध्ये आगवे, वनगुळे, निवसर, व्हेळ, कोर्ले, देवधे, गोळवशी, हर्दखळे या ग्रामपंचायतींचा समावेश आहे. नागरिकांचा मागास प्रवर्गासाठी ८ ग्रामपंचायतींचे आरक्षण काढण्यात आले. यामध्ये आसगे, खावडी, वेरळ, आंजणारी, गवाणे, कुरंग, रिंगणे आणि रुण या ग्रामपंचायतींचा समावेश आहे. तसेच अनुसूचित जाती प्रवर्गासाठी आरगाव आणि मठ या दोन ग्रामपंचायती तर अनुसूचित जाती स्त्री प्रवर्गासाठी जावडे आणि शिपोशी या दोन ग्रामपंचायतीचे आरक्षण ठेवण्यात आले आहे.
दरम्यान, तालुक्यातील ग्रामपंचायतींच्या सरपंचपदाच्या या आरक्षण सोडतीमुळे सरपंचपदासाठी इच्छुक असलेल्या गावातील राजकीय पुढाऱ्यांचा चांगलाच हिरमोड झाला आहे. आपल्या ग्रामपंचायतीच्या सरपंचपदाचे आरक्षण मनाजोगे न पडल्याने त्यांच्यामध्ये नाराजी पसरल्याचे दिसून आले.
